Кина денеска најави дека ќе одржи воени вежби во близина на јужниот дел на Жолтото Море и Бохај, во близина на Јужна Кореја. Се очекува вежбите да започнат утре и да траат до 8 септември.
Источната команда на кинеската војска објави на платформата Weibo дека ќе продолжи да спроведува координирани поморски и воздушни воени вежби околу Тајван, а фокусот на овие вежби ќе биде тестирање на воздушни напади од копно и воздушни напади со долг дострел, пренесуваат локалните медиуми.
Од друга страна, пак, Тајван најави одговор на кинеските воени вежби.
Официјалната тајванска Централна новинска агенција објави дека војската на Тајван ќе спроведе артилериски вежби со боева муниција во јужниот дел на округот Пингтунг во вторник и четврток како одговор на кинеските вежби.
Агенцијата информира дека вежбите ќе вклучуваат снајперисти, борбени возила, оклопни возила, како и напаѓачки хеликоптери, повикувајќи се на анонимен извор.
Во меѓувреме, тајванското Министерство за транспорт соопшти дека летовите низ неговиот воздушен простор постепено се обновуваат бидејќи повеќето известувања за кинески воени вежби во близина на островот „повеќе не се во сила“.
Сепак, Министерството во соопштението наведе дека Тајван ќе продолжи да ги насочува летовите и бродовите подалеку од кинеската воена вежба во близина на неговиот источен брег до 10 часот по локално време во понеделник наутро.
Тајванскиот совет за прашања на копното (MAC) ги повика властите во Пекинг „да бидат воздржани и веднаш да престанат со сето нивно воинствено однесување“. Советот ја обвини Кина дека продолжува со воените вежби околу Тајван „како дел од симулирање напад и блокада заради заплашување на Тајван и соседните земји“.
