Кина соопшти дека ќе вложи максимални напори за да постигне мирно обединување со Тајван, но сепак не се откажува од употребата на сила за заштита од сите сепаратистички активности
Кинеското Министерство за одбрана денеска објави соопштение во кое вели дека Пекинг ќе работи со најголема искреност и ќе вложи максимални напори за да постигне мирно обединување со Тајван, пренесува Асошиејтед прес.
„Сепак, нема да се откажеме од употребата на сила и го задржуваме правото да ги преземеме сите неопходни мерки за заштита од надворешно мешање и од сите сепаратистички активности“,
велат од кинеското Министерство.
Оттаму додаваат дека земјата ќе биде подготвена да одговори со употреба на сила или други неопходни средства доколку има мешање на надворешни сили или радикално дејствување на сепаратистичките елементи и се нагласува дека крајната цел е да се обезбедат перспективите за мирно обединување на Кина.
Пекинг ги продолжи воените вежби без да објави кога ќе завршат, а тие започнаа непосредно пред посетата на претседателката на Претставничкиот дом на САД, Ненси Пелоси, на Тајван минатата недела.
Во соопштенијата на министерството и неговата Источна команда беше оценето дека вежбите ја постигнале својата цел, а тоа е да се испрати предупредување до оние што се залагаат за формална независност на Тајван и нивните странски поддржувачи.
Вчера портпаролот на кинеското Министерство за надворешни работи, Ванг Венбин, рече дека вежбите што ги спроведува кинеската војска околу Тајван се за да ги предупреди САД и да им одржи лекција на тајванските сепаратисти.