Премиерот Заев вели дека Владата има најава дека од Кина уште во текот на овој месец може да бидат испорачани 200.000 вакцини.
„Ќе видиме кои се условите. Кина има пет вакцини кои ги поминале фазите и тие веќе се дистрибуираат надвор од Кина и две во фаза на тестирање. Чекаме и од ЕУ од Ковакс механизмот, од кои 100 милиони вакцини се за Западен Балкан“,
истакна премиерот во интервју за ТВ Сител.
Заев вели дека не се знае точниот број на вакцини кои ќе пристигнат од европските земји и од нашите соседи, бидејќи и тие што ветија дека ќе издвојат дел за Македонија, како Австрија, Полска, Бугарија, и Грција, добиле десет пати помали количини од најавените.
„Ветено дека ќе добиеме одредени количини, тоа е европска солидарност, тие ги добија првите количини, а веќе стасуваат и вторите количини во најави. Само пет проценти ако споделат со Западен Балкан, заедно ќе одиме со ЕУ со задоцнување од една недела или две зад нив“, рече Заев, нагласувајќи дека е најважно да стигнат вакцините до граѓаните и Македонија има средства да набави вакцина, од било која група.
Според него, важно е вакцините да стигнат на време.
„Секако дека ќе се вакцинирам, но, без да ги кршам протоколите, да не бидам пред медицинските работници, пензионерите и хронично болните, јас ќе го дадам примерот и ќе се вакцинирам за да испратам порака дека таа е здрава, безбедна. И сега ја користам приликата да апелирам до сите граѓани, дека според светските експерти таа е исправна и треба сите да ја примиме, освен за оние групи за кои лекарите ќе го исклучат тоа“, подвлече премиерот, додавајќи дека вакцинацијата ќе се врши најпрво кај медицинските работници, пензионерите, хронично болните, а потоа кај останатите граѓани.
Заев најави и дека државата заедно со медиумските работници ќе развие стратегија за јавна кампања која треба да ја подигне свеста кај граѓаните за масовна вакцинација.