„Во случај на провокации веднаш следува воен одговор“, предупреди Михаел Подољак, советник на украинскиот претседател, појаснувајќи дека доколку има потреба, сите проверки на пратките ќе бидат спроведувани од „заеднички групи“ во турските територијални води, без притоа да посочи каков би бил составот на тие групи
Украина договор за транспорт на житото од своите пристаништа ќе потпише исклучиво со Обединетите Нации (ОН) и со Турција, а не со Русија, најави Михаел Подољак, советникот на претседателот на Украина, Володимир Зеленски.
Подољак преку Твитер истакнува дека Украина не потпишува никаков договор со Русија, додавајќи дека руската страна ќе потпише идентичен договор за блокираното жито во црноморските пристаништа со Турција и со ОН.
Истовремено украинската страна категорично отфрла можност во транспортот да бидат инволвирани руски бродови или какво било руско присуство во украинските пристаништа.
„Во случај на провокации веднаш следува воен одговор“, предупреди Подољак, појаснувајќи дека доколку има потреба, сите проверки на пратките ќе бидат спроведувани од „заеднички групи“ во турските територијални води, без притоа да посочи каков би бил составот на тие групи.
За попладнево во Истанбул е закажана средба на претставници на ОН, Турција, Русија и на Украина, на која е предвидено потпишување договор за отворање коридори за транспорт на жито од украинските пристаништа преку Црното Море.
Тоа би бил најголемиот компромис што го постигнале Москва и Киев од почетокот на војната во февруари.
Гутереш: Ова е договор за целиот свет
Пред потпишувањето на договорот, генералниот секретар на ОН, Антонио Гутереш, одржа краток говор.
„Овој договор ќе овозможи извоз на жито од Украина, а ОН ќе работат на обезбедување на неговиот успех. Денеска се појави светлина на надеж на Црното Море. Светло на олеснување за светот потребно повеќе од кога било“,
истакна Гутереш.
Тој додаде дека договорот ќе ги стабилизира глобалните цени на храната.
„Благодарам на Русија и Украина што ги надминаа сите разлики и ги оставија настрана нивните несогласувања за да се отвори патот за иницијатива која ќе им служи на заедничките интереси на целиот свет“,
посочи Гутереш, додавајќи дека „фокусот беше на она што е најважно за светот“.