Филипче денеска изјави дека системот засега одговара на бројот на пријавени здравствени работници за вакцинација
Системот за вакцинација сосема одговара на капацитетот на пријавени здравствени работници, а во зависност од натамошните потреби тој може и да се надградува, изјави денеска министерот Венко Филипче коментирајќи ја забелешката дека најавата за вакцинирање по 2 500 лица дневно значи дека процесот ќе трае долго.
„Сега се фокусиравме на здравствените работници и системот е соодветен за пријавената бројка. Тргнуваме со системот на вакцинација и тој ќе се надградува. Зедовме примери од другите земји. А понатаму може во функција да се стават и модуларните болници“,
рече Филипче.
Сите вакцинални пунктови, без разлика каде се наоѓаат во земјава, ќе бидат организирани на ист начин, и сѐ ќе зависи од просторниот капацитет и од бројот на здравствени работници што е на располагање.
Како пример ја посочи Поликлиниката „Јане Сандански“ каде што ќе има три пункта, каде што дневно ќе може да се вакцинираат 240 лица, во две смени, со запазени параметри за влез и излез на лицата и краток престој по примањето вакцина.
Тој рече дека секој може да се пријави за вакцинација преку „Мој термин“, а системот сам генерира приоритети.