Последните изјави кои доаѓаат од највисоките владини претставници на Катар се дека разгворите се заглавени и дека земјата ја преоценува својата улога, која според премиерот на заливската држава се експлоатира
Според изјавите на премиерот на Катар, заливската држава ја преоценува својата улога како посредник во преговорите за постигнување договор за прекин на огнот во војната меѓу Израел и Хамас, пренесува утрово британски „Гардијан“.
Имено, Катар со Соединетите Американски Држави (САД) и Египет, беше ангажиран во неколкунеделните разговори за доаѓање до решение за примирје во Појасот Газа и ослободување на израелските заложници што ги држи Хамас во замена за палестински затвореници кои се наоѓаат во израелските затвори.
Последните изјави кои доаѓаат од највисоките владини претставници на Катар се дека разговорите се заглавени и дека земјата ја преоценува својата улога, која според премиерот на заливската држава се експлоатира.
„За жал видовме дека имаше злоупотреба на ова посредување во корист на тесни политички интереси. Ова значи дека државата Катар повика на сеопфатна евалуација на оваа улога. Сега сме во фаза да го оцениме посредувањето и, исто така, да оцениме како страните се ангажираат во ова посредување“,
изјавил премиерот Мохамед бин Абдулрахман бин Јасим ал Тани на прес-конфренеција во Доха, пренесува Би-би-си.
Во врска со разговорите за прекин на огнот во Газа, шеикот Мохамед претходно вчера изјави дека тие се заглавени и поминуваат низ чувствителна фаза.
„Поминуваме низ чувствителна фаза со одреден застој и се обидуваме колку што е можно повеќе да го решиме овој застој“,
рече катарскиот премиер.
Инаку, Катар, кој од 2012 година со одобрување на САД му обезбедува гостопримство на политичкото раководство на Хамас.
Катарскиот премиер, кој истовремено ја извршува и функцијата министер за надворешни работи, на прес-конференција не посочил ниту една конкретна личност на која се однесуваат неговите коментари, но, како што наведува британскиот национален сервис, некои од претставниците во американскиот Конгрес го обвинија Катар дека не врши доволен притисок врз Хамас да направи отстапки.
Во вторникот, катарската амбасада во Вашингтон издаде соопштение во кое го укори демократскиот пратеник Стени Хојер поради неговите повици до Катар да изврши притисок врз Хамас за да обезбеди ослободување на заложниците, наведува „Гардијан“.
Со новите стравувања дека војната во Газа може да ескалира во поширок регионален конфликт, како што се зголемуваат тензиите меѓу Израел и Иран, катарскиот премиер предупреди на проширување на конфликтот и ја повика пошироката меѓународна заедница да ги преземе своите одговорности и да ја запре војната.
„Од почетокот на оваа војна предупредуваше од проширување на кругот на конфликти, а денес гледаме конфликти на различни фронтови“,
изјавил вчера премиерот на заливската држава.