Статусот на Албанците, додава Касами, не е загрозен како што пишува Ахмети во писмата
Писмата што Али Ахмети ги праќа до премиерот и до странските политичари не се во интерес на граѓаните, вели претседателот на Движењето Беса, Билал Касами.
Касами му порача на Ахмети дека треба да работи на реформи во неговата партија ДУИ, наместо да пишува писма. Тој вели дека Ахмети треба да се спреми за следните избори и да се занимава со работи кои се својствени за опозициска партија.
Статусот на Албанците, додава Касами, не е загрозен како што пишува Ахмети во писмата.
„Го уверуваме и Ахмети и сите граѓани во оваа држава дека нема уназадување на правата на Албанците и ние како коалиција ќе работиме за подобрување на животот на сите граѓани. За нас е важно Македонија да оди напред и меѓуетничките односи, но и правата на сите граѓани и животот на сите граѓани да биде унапреден. Со тоа ние на дела покажуваме дека работиме во интерес на граѓаните“,
рече Касами одговарајќи на новинарски прашања на денешното промовирање на новоуреден паркинг во Тетово.
Од партијата на Али Ахмети вчера информираа дека нивниот лидер испратил писмо до лидерот на ВМРО-ДПМНЕ, Христијан Мицкоски, во кое изразил загриженост за неодамнешните одлуки на Уставниот суд за „укинување на клучните механизми за заштита на заедниците“ и нивното влијание врз, како што вели, меѓуетничката кохезија и одржливост на земјата.
Ахмети предупредува дека во актуелната комплексна геополитичка состојба во светот и регионот, за која оцени дека е поопасна од кога било од крајот на минатиот век, секое ново нарушување на меѓуетничките односи би имало, како што вели, сериозни последици за внатрешната кохезија и предвидливост.