Познатиот шведски политичар и дипломат, кој беше и премиер на Шведска, Карл Билд, на Твитер излезе со коментар за односите помеѓу Северна Македонија и Бугарија порачувајќи дека ако некоја држава наметнува некаква „историска вистина“ состојбата на Балканот ќе остане непроменета во однос на ЕУ процесите.
„Ако некој напредок кон Европската унија на Балканот зависи од една или друга држава која наметнува некаква ’историска вистина‘, можеме да бидеме сигурно дека ништо нема да се случи за следната или дури за следните две генерации“,
напиша Билд, кој важи за добар познавач на состојбите на Балканот.
If any 🇪🇺 progress in the Balkans will be dependent upon the one or the other state imposing some “historical truth” we can be certain that nothing will happen within a generation or two. 🇲🇰🇧🇬 https://t.co/vtdJBTDc2l
— Carl Bildt (@carlbildt) November 2, 2020
Тој ваквиот коментар го дава споделувајќи текст од „Ројтерс“ во кој се пишува за бугарските најави за вето на Северна Македонија доколу не се решат историските прашања односно ако земјава не признае дека идентитетот и јазикот имаат бугарски корени.
Во текстот понатаму се пренесуваат познатите ставови на министерката за надворешни работи Екатерина Захариева дека Софија смета оти македонскиот јазик и нација се создадени кон крајот на 40-тите години од минатиот век и дека Бугарија не го оспорува правото на самоопределување ниту правото да го нарекуваме јазикот како што сакаме, но оти мора да ја признаеме „историската вистина“.