Потегот на канадските власти, како што потсетува Ројтерс, доаѓа неколку месеци откако Австралија стана првата земја што донесе таква забрана
Брет Каравеј, вонреден професор на Универзитетот во Торонто, чија изјава ја пренесува агенцијата, вели дека канадскиот предлог ќе биде посеопфатен од австралискиот, бидејќи би вклучувал посложен сет обврски за високотехнолошките комапнии кои имаат социјални платформи
Канадската влада вчера претстави нов закон за дигитална безбедност со кој се предвидува забрана на социјалните мрежи за деца под 16 години, со исклучоци за платформи кои исполнуваат одредени безбедносни стандарди, пренесе Ројтерс.
Потегот на канадските власти, потсетува агенцијата, доаѓа неколку месеци откако Австралија стана првата земја што донесе таква забрана.
„Предлог-законот, исто така, има за цел да ги направи чет-ботовите со вештачка интелигенција (ВИ), програми што симулираат човечки разговор, побезбедни преку воспоставување дигитален регулатор за безбедносни стандарди“,
изјавил владин функционер.
Според нацрт-законот, компаниите би можеле да се соочат со казни до три проценти од глобалните приходи или до 10 милиони канадски долари (7,2 милиони американски долари), за прекршување на легислативните одредби.
„Платформите на социјалните медиуми и чет-ботовите со вештачка интелигенција се дизајнирани да привлечат внимание. Тие не поддржуваат здрав развој на детството и станаа извор на анксиозност, изолација, депресија и мноштво други предизвици за менталното здравје кај многу млади Канаѓани“,
изјави министерот за канадски идентитет и култура, Марк Милер.
Воведувањето на законот се очекува да обезбеди побезбедна средина за младите Канаѓани и да им овозможи да се поврзуваат лично, да градат пријателства, да се фокусираат во училиштето и да учат вештини од реалниот свет за да можат да напредуваат.
Предлог-законот во Парламентот доаѓа неколку недели откако семејствата погодени од едно од најлошите масовни пукања во земјата го тужеа OpenAI, тврдејќи дека компанијата знаела оти наводниот напаѓач планира напад врз ChatGPT, но не ја известила полицијата.
Од OpenAI не одговорија веднаш на барањето за коментар.
Во декември лани Австралија стана првата земја во светот што ги забрани социјалните медиуми за деца под 16 години. Еден месец по воведувањето на законот, компаниите за социјални медиуми колективно ги деактивираа сметките на речиси пет милиони тинејџери.
Владини претставници на технички брифинг за новинарите соопштиле дека можеби ќе биде потребна една година додека да се донесе законот и уште 18 месеци додека да се воспостави регулаторното тело кое ќе треба да ги надгледува безбедносните стандарди.
Портпаролот на „Гугл“ (Google), компанијата која е сопственик на „Јутјуб“ (YouTube), изјави дека компанијата е посветена на соработка со федералната влада за воспоставување повисоки безбедносни стандарди на сите платформи, така што родителите имаат доверба и контрола да изберат подобри, побезбедни онлајн искуства за своите деца.
Компанијата „Мета“, која е сопственик на Инстаграм и Фејсбук, како и платформата Икс, претходно Твитер, на Илон Маск, и Снепчат (Snapchat), не одговориле вендаш на барањата за коментар.
Франција, Данска и Полска, исто така, размислуваат за заострување на правилата за користење на социјалните медиуми од страна на децата, додека Грција во април објави дека ќе го забрани пристапот за лица под 15 години од јануари 2027 година.
Канадскиот премиер Марк Карни има тесно мнозинство во парламентот, кој наскоро треба да влезе во летна пауза, поради што се очекува со донесувањето на законот да се продолжи по нејзиното завршување.
Брет Каравеј, вонреден професор на Универзитетот во Торонто, кој се фокусира на технологијата и приватноста, вели дека канадскиот предлог ќе биде посеопфатен од австралискиот закон, пренесува Ројтерс.
„Канадскиот предлог би вклучувал посложен сет на обврски и (ре)дизајн на платформата. Неговата цел е да го редизајнира екосистемот на социјалните медиуми за да го направи побезбеден за децата, додека австралискиот закон е за ограничување на пристапот до екосистемот“,
рече тој.
Опсегот на легислативата е исто така поширок бидејќи канадскиот закон би се однесувал и на вештачката интелигенција.