Трамп и неговите помошници предале повеќе документи во јуни, а потоа агентите на ФБИ, постапувајќи по судски налог за претрес, одзеле уште дваесетина кутии, вклучително и 11 кутии со доверливи досиеја на 8 август, додека ја претресувале неговата канцеларија, складиште во подрумот и други простории на имотот
Поранешниот американски претседател Доналд Трамп однел со себе повеќе од 700 страници доверливи документи, вклучително и некои кои содржат врвни тајни на владата, по завршувањето на мандатот минатата година, објави денеска американскиот Национален архив.
Во писмо со датум од 10 мај, вршителот на должноста архивар на САД, Дебра Штајдел Вол до еден од адвокатите на Трамп, Еван Коркоран, таа ги информира претставниците на Трамп дека не може да му се дозволи на поранешниот претседател да задржи некои од документите, за што Трамп се повикува на извршна наредба од неговото време во Белата куќа, јави Гласот на Америка.
Вол потенцира дека има загриженост во Одделот за национална безбедност на Министерството за правда поради „потенцијалната штета што произлегува од очигледниот начин на складирање и транспортирање на овие материјали“ до имотот на Трамп во Мар-а-Лаго, наместо да бидат предадени во Националниот архив по завршувањето на неговиот претседателски мандат, како што налага американскиот закон.
Во нејзиното писмо се наведува дека има „над 100 документи со ознаки за класификација“ во 15 кутии со материјали што владата ги одзеде од Мар-а-Лаго во јануари, во првиот од трите претреси оваа година кога ФБИ и американските архивари собраа кутии со доверливи материјали од зимската резиденција на Трамп и приватниот клуб на брегот на Атлантикот.
Трамп и неговите помошници предале повеќе документи во јуни, а потоа агентите на ФБИ, постапувајќи по судски налог за претрес, одзеле уште дваесетина кутии, вклучително и 11 кутии со доверливи досиеја на 8 август, додека ја претресувале неговата канцеларија, складиште во подрумот и други простории на имотот.
Некои од извадените документи се класифицирани како „TS/SCI“, што значи „Топ тајни/чувствителни информации“ или означени како „Специјални програми за пристап“, кои содржат некои од најстрого чуваните тајни на владата и увидот во нив е само во безбедни владини објекти, а не во резиденција како Мар-а-Лаго. Покрај тоа што е дом на Трамп неколку месеци во годината, тоа е и клуб за вечера и хотел од висока класа за лицата кои плаќаат членарина.
Трамп тврди дека ги декласифицирал материјалите пред да му заврши мандатот на 20 јануари 2021 година и пред Џо Бајден да стане претседател на САД, но ниту Трамп ниту неговите помошници не приложиле документирани докази за таква декласификација.
Џон Соломон, еден од сојузниците на Трамп во медиумите и еден од соработниците на поранешниот претседател со архивите, прв го откри писмото од Вол во понеделникот навечер, по што го објави и Националниот архив.
Овие информации уследија откако адвокатите на Трамп во понеделникот побараа од федералниот суд привремено да го блокира ФБИ да ги прегледа документите добиени од неговиот имот на Флорида додека не биде назначено специјално лице кое ќе ги одвои сите материјали опфатени со извршната привилегија и ќе му ги врати.
Федералните истражители истражуваат дали Трамп незаконски ги чувал записите во Мар-а-Лаго, тврдејќи дека во налогот за претрес што го користел за претресот на 8 август, дека тој можеби прекршил три американски закони, вклучувајќи го и Законот за шпионажа на САД.
„Њујорк тајмс“ вчера, пак, објави дека севкупно, владата открила повеќе од 300 доверливи документи од имотот на Трамп, вклучувајќи ги материјали на ЦИА, Националната агенција за безбедност и ФБИ, иако содржината на материјалот не е откриена.
Претресот е дел од федералната истрага за тоа дали Трамп незаконски отстранил документи кога ја напушти функцијата во јануари 2021 година по поразот на претседателските избори од демократот Џо Бајден.
За време на претресот на домот на Трамп, ФБИ заплени 11 комплети доверливи материјали, од кои некои беа означени како „строго доверливо“ – највисоко ниво на тајност резервирано за најстрого чуваните информации за националната безбедност на САД и кои може да ги гледа само специјални владини агенции.