Американската влада пронашла повеќе од 300 доверливи документи за време на претресот во куќата на Трамп, вклучувајќи и материјали од ЦИА, Агенцијата за национална безбедност и ФБИ, извести во понеделникот „Њујорк тајмс“ повикувајќи се на добро информирани извори за случајот
Поранешниот американски претседател Доналд Трамп поднесе тужба против американската влада поради претресот на неговиот имот и побара од судот привремено да го блокира ФБИ во процесот на прегледување на материјалите кои пред две недели тие ги запленија од неговиот дом на Флорида, сè додека не се именува специјален службеник кој ќе го надгледува овој процес, пренесе Ројтерс.
Трамп во тужбата, поднесена во понеделникот до федералниот суд во Вест Палм Бич на Флорида, бара и американското Министерство за правда да му достави детален список на предмети што ФБИ ги однел од неговата куќа при претресот на 8 август, како и да му биде вратено сè она што не е во рамките за налогот за претрес, пренесува Ројтерс.
„Не може да се дозволи политиката да влијае врз спроведувањето на правдата… Спроведувањето на законот не може да се користи како оружје за политички цели“,
се вели во барањето на Трамп.
Понекогаш во многу чувствителни случаи судот може да назначи специјален администратор, обично пензиониран судија или адвокат, да ги разгледа запленетите материјали и да се погрижи истражителите да не ги видат заштитените информации, пишува Ројтерс.
Така, за време на претресот на ФБИ на домовите на поранешните адвокати на Трамп, Мајкл Коен и Руди Џулијан, канцеларијата на американскиот обвинител на Менхетн побара именување на специјален управник.
Претресот од 8 август на Флорида претставува значајна ескалација во една од многуте федерални и државни истраги со кои Трамп се соочува и се однесуваат на времето поминато на функција, како и на неговиот приватен бизнис.
Откако поранешниот американски претседател се пожали во медиумите дека претресот е политички мотивиран, американскиот државен обвинител Мерик Гарланд побара од судот да објави копија од налогот за претрес и листата на одземени предмети.
Американската влада пронашла повеќе од 300 доверливи документи за време на претресот во куќата на Трамп, вклучувајќи и материјали од ЦИА, Агенцијата за национална безбедност и ФБИ, извести во понеделникот „Њујорк тајмс“ повикувајќи се на добро информирани извори за случајот.
Претресот на ФБИ е дел од федералната истрага за тоа дали Трамп незаконски отстранил документи кога ја напушти функцијата во јануари 2021 година откако изгуби на претседателските избори од демократскиот кандидат Џозеф Бајден.