Предвидена е посебна процедура за гласачите што не се запишани во Избирачкиот список, а ги исполнуваат условите, да може да го остварат правото на глас на денот на изборите
Гласачите, на претстојните локални избори, ќе можат да гласаат и со истечени лични карти, а ќе може да гласаат и оние што ги нема во Избирачкиот список, ама ги исполнуваат условите… Државната изборна комисија, на денешната седница, едногласно го усвои Упатството за начинот на утврдување на идентитетот на гласачот, кое произлегува од новите измени на Изборниот законик.
„Една од измените е дека граѓаните можат да гласаат со лична карта која е истечена од денот на распишување до денот на одржување на изборите“,
рече потпретседателката на ДИК, Дитмире Шеху, како што пренесува МИА.
Втората измена, како што појасни таа, е дека граѓаните ќе можат да гласаат со патни исправи, но, според измените на Законот за патни исправи, документот ќе се смета со рок на важност од 31 јули 2020 до 31 декември 2021 година
„Третата измена е по препорака на ОБСЕ, што ја прифатија и пратениците, а се однесува на тоа граѓаните кои не се во Избирачкиот список, а ги исполнуваат условите, да гласаат на денот на изборите. Тоа ќе биде овозможено по добивање решение од ДИК, а по поднесен приговор за заштита на личното избирачко право и откако општинската изборна комисија ќе утврди дека граѓанинот ги исполнува условите дента да биде запишан во Избирачкиот список или по добивање пресуда од Управниот суд дента на тие граѓани ќе им се дозволи да гласаат, а избирачкиот одбор, со добиени копии од решението, ќе ги запише во Избирачкиот список“,
рече Шеху.
Според членот на ДИК, Борис Кондарко, бидејќи главните дејствија се поврзани со утврдување на идентитетот на гласачот, со воведувањето на новиот начин на идентификација на граѓаните со отпечаток на прст, главната работа се базира околу употреба и управување со уредот на избирачкото место од страна на претседателот на избирачкиот одбор или неговиот заменик. Тие ќе имаат посебни идентификациски смарт-картички и единствени ќе бидат овластени за управување со уредот за биометриска идентификација.
„Заради поголема заштита на процесот и поголема сигурност и транспарентност, со ова Упатство се предвидува претседателот на Избирачкиот одбор и неговиот заменик да бидат присутни за време на целиот ден на гласањето, особено пред отворањето на гласачките места и по завршувањето на гласањето и утврдувањето на резултатите од гласањето, со меѓусебен договор за редовни паузи во текот на денот“,
рече Кондарко.
Ова е новина, како што додаде, која произлегува од новиот начин на идентификација на гласачите и ќе биде посебно применета на обуките кои се прават на целата изборна администрација во однос на целата постапка на гласањето.
Членовите на ДИК, на седницата, едногласно ги усвоија прирачниците за едукација на општинските изборни комисии и на избирачките одбори, како и измените на регистарот на радиодифузери, печатени медиуми, електронски медиум, а беше усвоено и барањето за пет набљудувачи на Меѓународната фондација за изборни системи ИФЕС – Канцеларија во Северна Македонија.