Кога истражителите го пребарале телото на напаѓачот, нашле предавател, а при претресот на неговиот автомобил била откриена слушалка со жици кои влегувале во метална кутија сместена во багажникот, во која имало направа за која се претпоставува дека е експлозив
Повеќе од 20 пиштоли се регистрирани на таткото на Томас Метју Крукс, напаѓачот кој пукаше во поранешниот американски претседател и кандидат за нов мандат Доналд Трамп. Сите пиштоли биле купени легално, според записите на полициските службеници, пренесува Си-ен-ен.
Кога истражителите го пребарале телото на напаѓачот, нашле предавател, а при претресот на неговиот автомобил била откриена слушалка со жици кои влегувале во метална кутија сместена во багажникот, во која имало направа за која се претпоставува дека е експлозив.
Според Си-ен-ен, инспекторите се обидуваат да утврдат дали далечинскиот управувач поврзан со можна експлозивна направа во возилото на напаѓачот бил дел од заговорот за атентат на Доналд Трамп.
„Една теорија што се разгледува е дали напаѓачот имал намера да активира експлозив во неговиот автомобил како тактика да го одвлече вниманието на обезбедувањето. Сепак, фактот што Крукс бил забележан од граѓани и соочен со локален полицаец можеби го поттикнал да го забрза својот план и да не ја искористи експлозивната направа“,
пишува Си-ен-ен.
Томас Метју Крукс во саботата испукал повеќе куршуми кон поранешниот претседател Доналд Трамп кој таа вечер имаше митинг во Батлер, Пенсилванија.
Еден куршум го погодил Трамп во горниот дел од десно уво, што му предизвика мало крварење, но без сериозни повреди. Еден учесник на митингот беше убиен во пукотницата, а двајца други беа „критично повредени“. Крукс потоа беше убиен од агенти на Тајната служба, соопштија властите.
Тивок, срамежлив, прилично паметен кој не зборувал многу се само дел од коментарите за Томас Метју Крукс од Бетел парк, Пенсилванија кого ФБИ го идентификуваше како личност која стои зад обидот за атентат на поранешниот американски претседател и кандидат за нов мандат Доналд Трамп.