По цела година наместо фабрика има ливада која не е ни искосена, велат од ВМРО-ДПМНЕ за местото во ТИРЗ Тетово на кое требаше уште лани да се гради фабрика за електрични автомобили. Од партијата, обвинуваќи дека се работи за лажна најава за инвестиција, прашаа каде завршиле околу 43 милиони евра државна помош
ДУИ и СДС денеска мора да одговорат каде е фабриката за електрични автомобили, откако пред точно една година направија прескапа прослава за наводен камeн-темелник во ТИРЗ Тетово, прашуваат од опозициската ВМРО-ДПМНЕ.
фото: „360 степени“
„Да потсетам, на 13 август лани цела влада на ДУИ и СДС организираа скапа манифестација за отпочнување на градба на фабрика за електрични автомобили, со тоа што во 2024 година требаше да се возат првите коли на струја од Тетово. Димитар Ковачевски порача дека ќе се отворат 890 добро платени работни места, а по тие изјави се налепија бројки од 3 000-4 000 поврзани вработувања во ТИРЗ Тетово“,
потсети партискиот портпарол, Наум Стоилковски.
Стоилковски праша, кога веќе ја нема инвестицијата, каде се 43 милиони евра што биле издвоени од државата.
„По цела година наместо фабрика има ливада која не е ни искосена. Очекуваме и по овој прес ДУИ и СДС, Крешник Бектеши од позиција министер за економија и Јован Деспотовски од позиција директор на ТИРЗ, повторно да тврдат дека сè тече според планот и дека изградабата на фабриката ќе почне наскоро. Но, почитувани, и Бектеши и Десподовски, и ДУИ и СДС, мора да одговорат: Каде е фабриката за електрични автомобили која доби и државна помош во износ од 43 милиони евра? Ако фабриката ја нема, каде завршија околу 43 милиони евра од државната помош? Колку чинеше прославата за лагата почеток на градба, дали и за тоа пари зема омилената Арберија?“,
праша Стоилковски.
Тој праша и дали ДУИ и СДСМ ќе признаат дека фабриката за автомобили е уште една лага поврзана со ДУИ и фирми спонзори на ДУИ и дали државата ќе го раскине договорот со фирмата блиска на ДУИ.
„И секако, по цела година празна нива наместо фабрика, Дестани од Владата доби концесии за рудникот Иловица? Само избори се спасот!“,
рече портпаролот.
Инаку, на 13 август 2022 година, на годишнината од Рамковниот договор, беше поставен камен-темелник на фабрика за електрични автомобили во Трговско-индустриската развојна зона – Тетово. На настанот присуствуваа премиерот Димитар Ковачевски и лидерот на ДУИ, Али Ахмети, со половина Влада. Најавено беше фабриката да почне да се гради за шест до осум недели.
„360 степени“ двапати беше на местото на кое требаше да се гради фабриката – во ноември 2022 и во април 2023 година. Регистриравме дека ниту една дополнителна лопата, освен онаа на помпезниот настан, не е фрлена. Така е до денеска. Тогаш, директорот на ТИРЗ, Јован Деспотовски, за „360 степени“ изјави дека нема никакво доцнење.
„Самиот деловен план и на компанијата што ни е приложен и во договорот за државна помош предвидува последниот квартал од годинава да започнат градежните активности“,
рече Деспотовски.
Премиерот Димитар Ковачевски, пак, на новинарско прашање одговори дека сè уште се работи на барања во врска со парцелата.
„Фабриката во Тетово ‘Е-го’, којашто потпиша договор за изградба на фабрика во слободната економска зона во Тетово, има одредени барања во делот на парцелата, со оглед на начинот на којшто го организираат производството и затоа правени се урбанистички промени, коишто знам по тоа што се случува и како што сум информиран од надлежните служби“,
рече Ковачевски.
„360 степени“ тогаш се обрати и до фирмата „Еколог“, која е локалниот партнер на инвеститорот, германската компанија „Е-го“. Не добивме одговор на прашањата – зошто доцни стартот, дали инвестицијата е одложена, кога ќе почне градбата и производството?