Европската Унија идентификувала лажни информации за коронавирусот што доаѓаат од Русија, изјави за ДПА потпретседателката на Европската комисија, Вера Јурова.
Комесарката за вредности и транспарентност посочува дека кампањата на Унијата „EUvsDisinfo“ собрала повеќе од 150 дезинформации поврзани со Кремљ, а се однесувале на ковид-19.
Сепак, Јурова потенцира дека не може да се каже дека зад ваквите лажни вести стои државата бидејќи нема доволно докази за тоа.
Таа посочи дека имало и официјални изјави на руските власти против ЕУ, за кои рече дека биле насочени кон предизвикување страв и нервоза на јавноста.
Според еврокомесарката, Кина, од друга страна, се потпира на пропаганда според која Европа нема да може да се справи со коронавирусот без помош на Кина.
Јурова уште еднаш повтори дека најдобар начин за борба против лажните информации и пропаганда е преку факти, додавајќи дека постои огромна потреба од факти и веродостојни информации.