„Овој процес, како што ми велат стручните служби, нема да биде релативно брзо завршен. Таму има проблеми што не зависат во моментов од Министерството“, вели министерката
Објектите на Факултетот за информатички науки и информатичко инженерство (ФИНКИ) и на Факултетот за физичко образование, спорт и здравје (ДИФ) нема да бидат завршени за брзо време, потврдува министерката за образование и наука Весна Јаневска. Таа вели дека до крајот на нејзиниот мандат ќе продолжи градбата на двете згради.
Според Јаневска, лице задолжено од Министерството веќе прави анализи и ја собира целокупната документација, а на терен биле и стручни екипи за да ја увидат физичката состојба на објектите.
„Во моментов правиме сериозни анализи и имаме задолжено човек од Министерството што ја прибира целокупната документација, прави анализи, стручни екипи излезени се неколку пати на терен да видат што се случува физички во двете згради. Овој процес, како што ми велат стручните служби, нема да биде релативно брзо завршен. Таму има проблеми што не зависат во моментов од Министерството. Една фирма банкротирала, па ја нема, па на надзорот му завршил договорот, па тие треба да се продолжуваат“,
рече Јаневска денеска во одговор на новинарско прашање на прес-конференција на која даде отчет за работата во првите 100 дена од новата влада.
Таа додаде и дека се во комуникација со Министерството за транспорт кое исто така ќе треба делумно да се вклучи во овој процес.
„Но, како и да е, процесот е започнат и планираме до крајот на овој мандат, ако не целосно, градбата секако ќе продолжи на двете згради“,
рече Јаневска.
Просторниот проблем на ФИНКИ не е нов. Но, по подолго време, во март годинава беше одново актуализира кога студентите од најмногубројниот државен факултет во земјава излегоа на два последователни протеста барајќи од надлежните решение и соодветен објект во кој ќе може да ја следат наставата.
Додека студентите здружено „бараа зграда од Влада“, тогашниот министер за образование и наука Јетон Шаќири во изјава за медиумите кажа дека барал средства за доизградба на започнатите објекти на ФИНКИ и Факултетот за физичка култура, но тие не биле одобрени.
Дека во годинашниот буџет не се одобрени средства за доизградба на објектот на ФИНКИ, како и на зградата на Факултетот за спорт, во одговор на прашања на „360 степени“ посочи и деканот на ФИНКИ, Боро Јакимовски.
Објектите на ФИНКИ и на ДИФ се во изградба од крајот на 2015 година. Тендерот за нивна изградба, тежок речиси 20 милиони евра, го доби штипски „Бетон“. Активно се градеше до 2019 година, кога во стечај замина изведувачот „Бетон – Штип“. Оттогаш градежните активности на терен, за кои до тој момент се потрошија околу 3,3 милиони евра, се стопирани.
Уште од самото основање на факултетот во 2011 година, студентите на ФИНКИ следат настава во повеќе објекти при технолошко-техничкиот кампус при УКИМ и немаат сопствени простории.