„Да сакале, да чувствувале одговорност, тие знаеја дека две години можеа да се спремат, знаеја дека ќе им дојде први септември 2022 каде што треба да има учебници за второ и петто одделение и требаше тоа со време да си го сработат“, смета претседателка на Комисијата за образование на ВМРО-ДПМНЕ, Весна Јаневска
Претседателка на Комисијата за образование на ВМРО-ДПМНЕ, Весна Јаневска во вечерашното гостување во ТВ Сител изјави дека ако власта сакала да има учебници на почетокот на учебната година, тогаш имала доволно време тоа да го стори, бидејќи според неа новата концепција не е нешто ново, туку таа е влезена во образовниот процес веќе две години.
„Концепцијата не е од вчера. Еве го слушам министерот, комисијата национална била формирана во февруари. Ама тоа е новиот состав на комисијата, комисијата имаше стар состав претходно. Да сакале, да чувствувале одговорност, тие знаеја дека две години можеа да се спремат, знаеја дека ќе им дојде први септември 2022 каде што треба да има учебници за второ и петто одделение и требаше тоа со време да си го сработат“,
рече Јаневска, додавајќи дека тоа е доволно време за да се подготват учебниците за второ и петто одделение.
Запрашана дали доцнењето на учебниците е поради тендери, Јаневска вели дека не е таа која што може да даде одговор на ова прашање и предложи со оваа тема да се позанимава истражувачкото новинарство во земјава, за како што рече, да истражи зошто доцнат, се повлекуваат и се препечатуваат учебници и наставни материјали.
Инаку, за учениците од прво, второ, четврто и од петто одделение се подготвени нови наставни програми за предметите, согласно Концепцијата за основно образование која од лани се спроведува етапно и, според планот, треба да биде заокружена за пет години во целото деветгодишно образование.
Учебниците според новите наставни програми се во различна фаза на одобрување и додека ги добијат, учениците од овие одделенија ќе учат од соодветни материјали во кои се разработени содржините од првото тримесечје. МОН уверува дека не се работи за скрипти, туку материјали кои се квалитетни и креативни и учениците ги добиваат бесплатно.
Министерот за образование и наука Јетон Шаќири вчера на прес-конференција истакна дека МОН е многу поподготвено од претходните години зашто на првиот училишен ден ќе има за сите ученици – материјали за учење за прво, второ, четврто и петто и учебници за останатите одделенија во основното и за средното образование.