Затворена е амбасадата на Израел во Грција откако било потврдено дека еден од вработените е заразен со коронавирусот. Дипломатското претставништво е доброволно затворено во следните две седмици, соопштија од Амбасадата, јави дописничката на МИА од Атина.
„Како превентивна мерка и грижа за јавното здравје, амбасадата на Државата Израел во Грција, повторно ќе се отвори на 23 март 2020 година, по две недели доброволно затворање, откако кај вработен во Амбасадата беше дијагностициран коронавирус. Амбасадорот и неговиот дипломатски тим ќе продолжат да работат од нивните домови“, напишаа од амбасадата на Израел на нивниот официјален Твитер налог, изразувајќи благодарност до грчката Влада за поддршката и соработката.
Наведено е дека амбасадорот и неговиот дипломатски тим се во добра здравствена состојба.
Во Грција попладнево беа потврдени 11 нови случаи на коронавирусот, со што бројот на заразени со Ковид-19 во земјата се искачи на 84 лица, од кои тројца се странски државјани.
„Од потврдените случаи, 27 се хоспитализирани, од кои еден во сериозна состојба, а останатите 57 се домашна изолација“,
соопшти претставникот на Министерството за здравство на Грција, задолжен за коронавирусот, професорот Сотирис Циодрас.
Поголемиот дел од заразените, односно 56, се поврзани со поклоничкото патување во Египет и Израел, 47 патници и девет лица кои биле во контакт со нив.
За четири лица, кои што се меѓу новите 11 потврдени случаи, според професорот, не постојат информации од каде се заразени, а во тек е процесот на проверка на контактите.
Министерот за здравство на Грција и професорот предупредија дека се очекува зголемување на бројот случаи во земјата.
На денешната прес-конференција во Министерството за здравство на Грција, акцентот беше посебно ставен на најранливите групи граѓани, за кои професорот Циодрас рече дека Комисијата на експерти при Министерството препорачува, оние кои имаат здравствени проблеми и се над 70 годишна возраст, лицата со хронични срцеви заболувања, со хронични респираторни проблеми, со дијабетес, да избегнуваат непотребни патувања.