Инаку, соопштението за дневни паузи во борбите дојде во пресрет на големиот муслимански празник Курбан бајрам
Израелската војска денеска соопшти дека воведува дневни паузи во борбите во јужниот дел на Газа со цел да се олесни испораката на хуманитарна помош за цивилното население во Појасот, на што со месеци повикуваа хуманитарните организации на Обединетите нации (ОН), јавуваат светските агенции.
Најавата за локална тактичка пауза во воените активности во областа Рафах, како што пишува АФП, доаѓа еден ден откако осум израелски војници загинаа во експлозија во близина на градот на крајниот југ на Појасот.
Претходно уште тројца војници беа убиени во други области во Газа, што е една од најголемите загуби на израелската армија во војната против милитантите на Хамас.
Изминатите месеци агенциите на Обединетите нации и други хуманитарни организации постојано алармираа за големиот недостиг на храна и други основи потребни во Појасот Газа откако израелските сили ги ограничија копнените патишта за испорака на помош и го затворија клучниот премин Рафах на границата со Египет, кој го зазедоа на почетокот на мај. Овој премин беше главната точка преку која конвоите со хуманитарна помош влегуваа во Газа од Египет.
„Локална тактичка пауза во воените активности за хуманитарни цели ќе се одржува од 8 часот (7 по средноевропско време) до 19 часот (18 по средноевропско време) секој ден до понатамошно известување по патот што води од преминот ‘Керем Шалом’ до Пут Салах ал Дин, а потоа кон север“,
се вели во соопштението на израелската војска.
Според извештаите на АФП од Газа денеска нема информации за нови напади, гранатирања или борби, иако во соопштението на израелската армија се нагласува дека нема прекини на непријателствата во јужниот дел на Појасот.
Одлуката, за која војската информира дека веќе е во сила, е дел од напорите за зголемување на количината на хуманитарна помош што влегува во Појасот Газа по разговорите со ОН и други организации, се наведува во извештајот.
Инаку, соопштението за дневните паузи во борбите дојде во пресрет на големиот муслимански празник Курбан бајрам.
Соединетите Американски Држави (САД) кои вршеа притисок врз блискиот сојузник Израел, како и врз Хамас да се согласат на планот за прекин на огнот што го предложи американскиот претседател Џо Бајден, во петокот воведоа санкции врз екстремистичка израелска група поради блокирање и напад на хуманитарни конвои за Газа.