Израелските здравствени власти соопштија дека се намалила ефикасноста на вакцината на „Фајзер“ при спречување на инфекции и симптоматски заболувања, но исто така наведуваат дека останува многу ефикасна во спречување на сериозни болести предизвикани од коронавирусот.
Намалувањето на ефикасноста на вакцината се совпаѓа со проширувањето на делта мутацијата на коронавирусот и укинувањето на мерките за одржување физичка дистанца во Израел.
„Ефикасноста на вакцината во спречување на инфекции и симптоматски заболувања се намали на 64 проценти од 6 јуни. Истовремено, вакцината на ‘Фајзер’ е ефикасна 93 проценти во спречување на хоспитализации и сериозни заболувања од коронавирусот“
објави израелското Министерство за здравство.
Портпаролот на компанијата „Фајзер“ одби да ги коментира податоците од Израел, но наведе други истражувања кои покажале дека антителата произведени од оваа вакцина сепак се во можност да ги неутрализираат сите тестирани варијанти на ковид-19, вклучувајќи ја и делта мутацијата, иако со намалена моќ, пишува „Ројтерс“.
Извештајот , пак, што во мај го објавија израелските власти покажа дека две дози од вакцината на „Фајзер“ штитат од инфекции , хоспитализации и други болести до 95%.