Министерката за одбрана Радмила Шекеринска смета дека се добар знак најавите на водачите на „Продолжуваме со промените“ за нов пристап во односите меѓу двете земји
Во своите изјави пред вчерашните избори Кирил Петков и Асен Василев нагласија дека треба да се смени парадигмата на односите меѓу двете земји, така што повеќе ќе се зборува за економија отколку за историја
Охрабрувачки е дека можната нова влада во Бугарија вели оти ни треба нов пристап. Ние ќе го имаме истиот дух на добрососедство, на отвореност и истата желба да најдеме решенија и да тргнеме напред, вели министерката за одбрана Радмила Шекеринска коментирајќи го исходот од вчерашните парламентарни избори во Бугарија, каде што однесе победа коалицијата „Продолжуваме со промените“.
„Ако има и половина од тој дух на бугарска страна, како што гледаме деновиве, можно е да видиме и п пресврт. Дефинитивно нов пристап ќе биде корисен и за нас и за нив’,
изјави Шекеринска.
Охрабрувачки се, нагласи таа, изјавите дадени во изминатиот период и резултатот од бугарските избори, затоа што, како што рече, Бугарија се доведе во ситуација да не блокира нас и Албанија, но на некој начин да се блокира и себе си.
Во своите изјави пред вчерашните избори Кирил Петков и Асен Василев, од коалицијата „Продолжуваме со промените“, нагласуваа дека моментно никој ниту во Бугарија ниту во Северна Македонија нема корист од тоа што меѓу двете земји нема најдобри меѓусоседски односи.
„Треба да ја смениме парадигмата во нашите односи и да видиме кои се заедничките економски работи што можат да ги направат двете земји. Како на пример, зошто нема авиокомпанија што лета од Софија до Скопје. Тоа треба да биде темата“,
изјави Петков.
Василев оцени дека во односите меѓу двете земји треба да се зборува за иднината и за сегашноста.
„Луѓето треба да се чувствуваат спокојни, никој да не биде угнетуван, треба да има заеднички бизниси, групи студенти од двете земји да можат да се посетуваат меѓусебно, да се организира балканско фудбалско првенство, а не само бугарско-македонско, и луѓето да се запознаат и да живеат поспокојно и во двете земји. Тогаш фокусот на историјата ќе се префрли на сегашноста и на она што можеме заедно да го направиме во иднина, бидејќи ако само гледаме назад, никогаш нема да направиме чекор напред“,
рече тој.
Тие зборови дејствуваат охрабрувачки, се разбира, тоа е сепак само најава, вели Шекеринска.
„Ние го поддржуваме тој апел за нов дух, за нов тип на дијалог во кој ќе се трудиме не да најдеме мана или причина да го блокираме соседот, туку да најдеме што и едните и другите можеме да извлечеме од поголема соработка“,
вели Шекеринска.
Министерот за надворешни работи Бујар Османи, кој од денеска престојува во дводневна работна посета на Брисел, утрово се сретна со својот бугарски колега Светлан Стоев од техничката влада во Софија.
Како што рече Османи во објава на својот фејсбук-профил, на состанокот била потврдена важноста и посветеноста кон напредокот во процесот на европската интеграција, регионалната соработка и добрососедството во регионот на Западниот Балкан, а со бугарскиот колега размениле видувања и за последните политички случувања, по завршувањето на изборните циклуси и во двете земји.