Во петокот и денеска на гласање излегоа 65,67 проценти од избирачите, а неколку дена пред парламентарните избори во аферата „Пандора документи“ се појави името на Андреј Бабиш, милијардер кој победи на изборите во 2017 година со ветување дека ќе се бори против корупцијата
Коалицијата „Заедно“, во која се двете главни опозициски групи во Чешка, освои 27,77 проценти од гласовите на парламентарните избори што завршија денеска и ќе има 71 пратеник. Владејачката партија АНО на премиерот Андреј Бабиш, пак, доби поддршка од 27,15 проценти, но сепак ќе еден мандат повеќе, според резултатите врз основа на 99,8 проценти пребројани гласови.
Бабиш и честиташе на коалицијата „Заедно“ за постигнатата победа, но, исто така, рече дека ќе разговара за формирање на идната влада, доколку претседателот Милош Земан му го довери мандатот.
Но и коалицијата „Заедно“ објави дека сака да формира влада, со коалицијата Пирати-градоначалници, која според овие резултати го освои третото место со 15,6 проценти од гласовите. Прагот од пет проценти го помина само уште партијата Слобода и директна демократија, која освои 9,57 проценти од гласовите, пренесува Радио Прага.
Комунистите, кои имаа претставници во парламентот од основањето на Чешка во 1993 година, останаа без мандат.
Во петокот и денеска на гласање во Чешка излегоа 65,67 проценти од избирачите со право на глас, а неколку дена пред парламентарните избори, во аферата „Пандора документи“ се појави името на Андреј Бабиш, милијардер кој победи на изборите во 2017 година со ветување дека ќе се бори против корупцијата и кој негира каква било поврзаност со аферата.