За жал, имаме бројни примери на раководни лица кои постигнале негативни резултати и наместо да бидат разрешени, тие се именувани на раководна позиција во друга институција. Се прашувам – кој труд се вреднува во општеството и која порака се пренесува на овој начин? Кон што целиме, која ни е целта? Да постигнеме или да не постигнеме резултати, вели претседателката на ДКСК во изјава за “360 степени”
За да се разреши некое лице, особено лица кои работат во области што се поврзани со доброто управување и со владеење на правото, како што се инспекторатите, потребно е навистина добро да биде образложено, смета истражувачот Миша Поповиќ
За да се разреши некој од раководна позиција потребно е да се има добро образложение за тоа, вели претседателката на Државната комисија за спречување корупција, Билјана Ивановска, откако денеска на седница на Владата беше разрешена в.д. директорката на Државниот инспекторат за животна средина, Ана Петровска.
Во изјава за „360 степени“, Ивановска прашува кон што цели државата ако се разрешуваат кадри што постигнале позитивни резултати во работењето. Посочува дека и натаму политиката има силно влијание и во поставувањето и во разрешувањето раководни лица.
„Од оние предмети што досега сме ги работеле, сме утврдиле дека, за жал, политичкото влијание е многу присутно во поставувањето и разрешувањето на директорите, за сметка на квалитетните програми и постигнатите резултати. Во случајов, станува збор за разрешување без соодветно образложение на директор кој постигнал позитивни разултати. За жал, имаме бројни примери на раководни лица кои постигнале негативни резултати и наместо да бидат разрешени, тие се именувани на раководна позиција во друга институција. Се прашувам – кој труд се вреднува во општеството и која порака се пренесува на овој начин? Кон што целиме, која ни е целта? Да постигнеме или да не постигнеме резултати“,
прашува таа.
Ивановска коментира дека ова не е прв ваков случај и потсетува на разрешувањето на директорот на Државниот пазарен инспекторат, Стојко Пауновски.
„Инспекторот беше почитуван, со изграден авторитет и го покажа својот интегритет, но за жал, на крајот, доби разрешување. Во сите меѓународни извештаи се нотира дека во земјата во подолг период има силно политичко влијание. Мислам дека тоа е најгорливото прашање кое треба час поскоро да се надмине““,
смета Ивановска.
Ивановска вели дека ДКСК се залага за системски решенија – и за именување и за разрешување. Целта е да се превенира корупција, непотизам и клиентелизам и затоа укажуваат дека поставување директори и членови на управен одбор треба да се врши без партиски влијанија, врз основа на понудена програма и план за работа.
Истражувачот од Институтот за демократија, Миша Поповиќ, е со сличен став. Потенцира дека именувањето и разрешувањето на раководни лица треба да биде врз основа на професионални стандарди, квалификации и компетенции.
„Разрешувањето треба да биде врз база на покажан неуспех и грешки во работата. За да се разреши некое лице, особено лица кои работат во области што се поврзани со доброто управување и со владеење на правото, како што се инспекторатите, потребно е навистина добро да биде образложено“,
вели Поповиќ.
Поповиќ смета дека ако се внимава на начинот на кој се поставуваат и разрешуваат раководните лица, државата отвора простор за професионални кадри да дојдат на тие позиции.
„Само на тој начин ги привлекувате професионалците да се пријавуваат за таквите работни позиции, затоа што покажувате во моментот кога тие добро работат дека се сигурни на својата позиција и не зависат од коалициските математики“,
смета тој.
По разрешувањето на Ана Петровска од функцијата в.д. директорка на ДИЖС, Владата на нејзино место го именува Сретен Стојковски, исто така за в.д. Одлуката е донесена без дебата на седницата со која претседавал првиот вицепремиер, Артан Груби.
Иако нејзиното разрешување се перцепира како кулминација на судирот во ДОМ, која е дел од владејачкото мнозинство, претседателката на оваа партија, Маја Морачанин, вели дека не го дала предлогот за смена на Петровска поради внатрепартиските превирања, туку поради поплаки што стигнувале за работата на ДИЖС.
На забелешките од Морачанин за досегашното раководење со ДИЖС, Петровска кусо одговара дека е нормално кога некој нешто бара, да најде аргументи за да го поткрепи своето барање пред јавноста.