Рекорди бележат и Холандија и Германија, а песимистички се и прогнозите за Велика Британија
Рекордни 10 925 нови случаи на коронавирус се регистрирани во Италија во последните 24 часа, а 47 лица починале, соопшти денеска Министерството за здравство.
Ова е втор ден по ред како се регистрира најголемо дневно зголемување на бројот на новозаболени од почетокот на пандемијата.
Италија беше најтешко погодената земја во Европа во првиот бран на епидемијата минатата пролет, а по бројот на жртви со 36 427 смртни случаи е на второ место по Велика Британија.
И Холандија постави нов негативен рекорд по бројот на новозаразени со коронавирусот, откако денеска се регистрирани повеќе од 8 000 заразени, а 29 лица починале, објави Националниот институт за јавно здравје.
Бројот на потврдени случаи на коронавирус денеска е 8 114, а од почетокот на епидемијата досега починале 6 737 лица.
Унгарија, земјата која до скоро имаше многу низок број на заразени, денеска регистрира 1 791 нови случаи на коронавирус, најмногу од почетокот на пандемијата, а починале 24 пациенти.
Од почетокот на епидемијата заразени се вкупно 44 816 лица, а бројот на смртни случаи е 1 109. Во моментов има повеќе од 30 000 активни случаи.
Унгарската Влада повторно ги предупреди граѓаните да ги почитуваат мерките за физичко растојание и одржување на хигиената. Забраната за влез за странски државјани сè уште е во сила. Освен во продавниците и јавниот превоз, носењето маска е задолжително во јавните и културните институции.
Забранети се посети на болници и домови за стари лица.
Во Германија во претходните 24 часа се регистрирани рекордни 7 830 новозаразени и 33 починати лица, објави Институтот „Роберт Кох“.
Поради тоа, канцеларката Ангела Меркел денеска упати денеска апел до граѓаните дека е неопходно да се направи се за да се спречи неконтролираното ширење на коронавирусот.
„Се наоѓаме во многу сериозна фаза на пандемијата на ковид-19. Секој ден се зголемува бројот на новозаразени. Пандемијата се шири повторно брзо и тоа побрзо отколку на почетокот, пред половина година. Доаѓаат тешки месеци. Како ќе изгледа зимата, каков ќе биде нашиот Божик, за тоа ќе се одлучува во следните денови и недели. За тоа одлучуваме сите со нашите делувања“,
нагласи таа во обраќањето до јавноста.
Таа побара од граѓаните да се откажат од секое патување кое не е неопходно, од прослави, како и, доколку е можно, да останат дома.
Во изминатите 24 часа во Франција се регистрирани нови 25 086 случаи со ковид-19 и 122 починати лица.
Според официјалните податоци, во изминатите седум дена хоспитализирани се 6 906 лица, од кои 1 204 се наоѓаат на интензивна нега. Од друга страна, идентификувани се 136 нови кластери, со што бројот на кластери кои се испитуваат достигна 1 615 во земјата.
Од почетокот на пандемијата досега во Франција се заразени 834 770 лица.
Националниот завод за статистика во Англија предупреди дека секоја недела се заразуваат 50 проценти повеќе луѓе отколку во претходниот период, објави „Дејли меил“.
Бројот на смртни случаи од ковид-19 во Англија би можел да скокне на 690 на ден за само две недели, ако продолжи трендот на зголемување на бројот на пациенти на неделно ниво.
Нивната проценка е дека околу 47 000 луѓе се заразуваат дневно во Англија, а бројките се удвојуваат на седум дена.
Бројката вклучува и асимптоматски случаи и заклучокот е дека стотици луѓе ќе умираат секој ден.