СДСМ бара итна истрага од страна надлежните институции за коруптивните зделки на министерот Тимчо Муцунски, како и утврдување на одговорност на вмешаните, но и одговор каде завршуваат парите од унгарскиот кредит
Министерството за надворешни работи и надворешна трговија потпишало договор за изградба на челична натстрешница во вредност од речиси 550 илјади евра со градежната компанија „Пирамид билдинг солушнс“, која била единствен понудувач на тендерот. Ова денеска на прес-конференција го соопшти портпаролката на Социјалдемократскиот сојуз (СДСМ), Богданка Кузеска, посочувајќи дека истата компанија имала блиска историја со министерот Тимчо Муцуински и додека тој бил градоначалник на Општина Аеродром добила 11 тендери вредни два милиони евра.
„Ја разоткриваме мрежата на министерот за надворешни работи Тимчо Муцунски кој го оживува проектот „Скопје 2014“ за повторно испумпување на пари од буџетот заедно со нови тендери од унгарскиот кредит. Според достапните информации, Министерството за надворешни работи потпишало договор за изградба на челична натстрешница во вредност од речиси 550 илјади евра. Со ова, Муцунски ја означи ерата на кражби од проектот „Скопје 2014“ на ВМРО-ДПМНЕ, кој светските медиуми го нарекоа најголемиот коруптивен проект во Европа“,
рече таа.
Скандалот, според неа, е уште поголем, зашто и овој случај е дел од тендерската мрежа на ВМРО-ДПМНЕ.
„Договорот за натстрешницата е склучен со градежната компанија ‘Пирамид билдинг солушнс‘, која била единствен понудувач на тендерот. Оваа компанија има долга историја на односи со Муцунски. Фирмата добила дури 11 тендери во Аеродром вредни два милиони евра. Додека тој бил градоначалник на Општина Аеродром, истата компанија добила договор вреден 335 илјади евра за хигиенски и комунални услуги“,
вели Кузеска.
Како што посочи тендерската мрежа на владејачката партија е поврзана и со парите од унгарскиот кредит кои граѓаните треба да ги враќаат.
„Од овие пари, омилената фирма на Муцунски добила три тендери вредни околу 1,8 милиони евра само во изминатите три месеци. Дури го добила и оној тендер за реконструкција на скверот зад ТЦ „Капитол“, вреден околу 700 илјади евра, каде на почетокот на работите присуствуваше и премиерот Христијан Мицкоски. Само преку бизнисот со општина Аеродром, речиси четири милиони евра завршиле кај оваа компанија“,
кажа портпаролката.
Оваа компанија, според Кузеска, има тендери и со други општини, меѓу кои со Гази Баба, каде во мандатот на ВМРО-ДПМНЕ добила осум тендери.
Затоа, според неа, основан е сомнежот дека ова е координирана шема на ВМРО-ДПМНЕ за тендерски мрежи и фаворизирање на блиски компании и испумпување на јавните пари во белата палата.
СДСМ бара итна истрага од страна надлежните институции за коруптивните зделки на министерот Тимчо Муцунски, како и утврдување на одговорност на вмешаните, но и одговор каде завршуваат парите од унгарскиот кредит.