Иран испрати „порака“ и до Албанија

Фокусот на светската јавност денеска е на размената на пораки меѓу Техеран и Вашингтон, откако доцна синоќа Иран нападна две американски бази во Ирак, како одмазда за убиството на иранскиот генерал Касем Сулејмани.

Американскиот претседател Доналд Трамп уверува дека неговата земја е подготвена на се. САД подготвува нови санкции за Иран, но се разгледуваат и воени сценарија за одговор на ракетниот напад.

Иранскиот врховен лидер, ајатолахот Али Хаменеи, во својот говор по бомбардирањето изјави дека нападот е шлаканица за САД и повика на отстранување на американското воено присуство на Блискиот Исток.

Што и порача и зошто Хаменеи е лут на Албанија?

Но, она што помина „под радарот“ на светските медиуми е пораката која ајатолахот Али Хаменеи ја упати до западниот сосед на С. Македонија – Албанија. Тој практично ја обвини официјална Тирана дека имала своја улога во поттикнувањето на насилството на неодамнешните протести во Иран против зголемувањето на цените на горивата.

„Во европска земја, во многу мала европска земја, но многу злобна, има некои американски елементи со некои ирански предавници. Тие се собраа за заговор против исламската републикана Иран”,
изјави ајатолахот Али Хаменеи.

Ова изјава на ајатолахот Али Хаменеи наменета за Албанија се должи на фактот што официјална Тирана во 2013 година се согласи на своја територија да прими ирански бегалци од групата “Mujahedin-e Khalq“ или во превод „Народни муџахедини на Иран“.

Станува збор за контроверзна група која е опозиција на Исламската Република уште од нејзиното воспоставување со Револуцијата од 1979 година.

Во изминатите децении неколку илјади припадници на движењето го напуштаат Иран и одат во Ирак, каде добиваат поддршка, прво, од ирачкиот диктатор Садам Хусеин, а потоа и од коалициските сили предводени од САД, по инвазијата на Ирак во 2003 година.

Во изминативе неколку години Албанија прими 3.000 припадници на групата на своја територија во договор со САД. Пред неполни три месеци албанската полиција објави дека превенирала напад врз иранските дисиденти на своја територија, за што го обвинија официјален Техеран.

Еди Рама: Албанија не е изложена на ризик од Иран

По овој говор на ајатолахот на Иран, албанскиот премиер Еди Рама изјави дека земјата не е изложена на потенцијална закана како резултат на иранско-американската конфронтација. Според Рама, иранските муџахедини во Албанија се дел од хуманитарна и неполитичка операција и дека во договорот е регулирана и хуманитарната мисија на иранската опозиција во Албанија.

Свој став изнесе и претседателот на Албанија, Илир Мета. Тој ги осуди и ракетните напади на Иран врз американските бази, но и квалификациите на Хамнеи за Албанија.

„Албанија не е злобна земја, туку демократска земја која и самата страдаше од невидено злобна диктатура… Веќе две децении Албанија е цврсто посветена во подршката на САД и членките на НАТО во нивните напори за борба против меѓународниот тероризам и секој чин што ја загрозува светската стабилност и мир“,
напиша Илир Мета на својот Фејсбук профил.

Прва потенцијална цел на Иран се 65.000 американски војници

И покрај пораката на Техеран до Тирана, под најголема закана за одмазднички напад остануваат американските трупи кои се распоредени на Блискиот Исток. Според податоците што ги објавуваат американските медиуми, станува збор за околу 65.000 американски војници.

Најголемиот контингент на Пентагон е во Авганистан, земја-сосед на Иран, каде што има 14.000 војници на САД. Следуваат Катар и Кувајт со по 13.000 американски војници на нивна територија. Во Ирак, кој исто така се граничи со Иран, има околу 6.000 американски војници, додека во Бахреин – мала земја во Персискиот Залив, лоцирана наспроти Иран, стационирани се околу 7.000 војници на САД, како и командата на Петтата американска флота задолжена да патролира во Персискиот Залив, Црвеното и Арапското Море низ кои се транспортира најголемиот дел од светската нафта.