Во периодот од 23 до 27 март инспекторатите во земјава направиле 7 633 надзори. Најголем дел од нив биле спроведени од страна на Државниот пазарен инспекторат – 5 155, информираше претседателката на Инспекцискиот совет, Магдалена Филиповска-Грашковска.
Пазарниот инспекторат, како што посочи таа, во тој период затворил 22 угостителски објекти кои не ја почитувале забраната за работа во време на вонредната состојба. Станува збор за локали во Скопје, Куманово, Гостивар и Тетово.
„Покрај овие контроли, Државниот пазарен инспекторат е задолжен и за контрола на замрзнатите цени. Во соработка со инспектори од УЈП направиле вкупно 928 надзори и кај повеќе од 60 трговци утврдено е покачување на цената, претежно на лимоните. Во сите случаи е постапено соодветно, односно сите тие ги вратија цените на лимоните од 11 март“,
рече Филиповска-Грашкоска.
Таа посочи дека Пазарниот инспекторат добил и голем број неосновани пријави, па апелираше граѓаните да пријавуваат реални случаи за да не се губи време и да се искористат сите капацитети.
Санитарниот и здравствен инспекторат, пак, од 23 до 27 март направил 246 надзори и издал 2 774 дозволи за влез на професионални возачи на товарни возила кои се неопходни за снабдувањето со стоки.
Агенцијата за храна и ветеринарство, посочи Филиповска-Грашкоска, извршила 367 контроли и изрекла 19 мерки поради неспроведени обуки на вработени за безбедност на храна, како и вработени без здравствен преглед на санитарна книшка. Издадени се и решенија за четири месарници и маркети поради лоша хигиенска состојба, кај кои се побарало веднаш да се постапи и да се изврши дератизација.
Инспекторатот за транспорт, според извештајот, направил 180 надзори и констатирал дека меѓуопштинскиот сообраќај е намален за дури 90 проценти, но забележал и еден случај каде што превозник не ја почитувал мерката да го преполови бројот на патници.
Агенцијата за лекови – МАЛМЕД, пак, во контролите што ги извршила посочила дека нема специфични отстапувања и дека секторот ги почитува препораките, се одржува ред во аптеките, а немало ниту нерегуларности околу цените.
Трудовиот инспекторат, пак, во околу 700 надзори што ги направил издал 13 решенија и 48 укажувања за работодавачи кои не ги почитувале препораките за превенција на Владата и не го организирале работењето според нив.