МАЛМЕД ѝ препорачува на Владата да утврди максимална цена на ракавици, заштитни маски и средства за дезинфекција, која не смее да се надмине во прометот на големо и мало
Претседателката на Инспекцискиот совет, Магдалена Филипоска-Грашкоска, денеска на прес-конференција во Владата ги соопшти резултатите од контролите што ги спровеле инспекторатите во земјава во периодот од 16 до 18 март.
Така, посочи таа, Државниот санитарен и здравствен инспекторат извршил вкупно 79 надзори и констатирано е дека јавните превозници одржуваат високо ниво на хигиена. Во однос на контролата при влез на скопскиот аеродром (додека тој работеше) и на граничните премини, констатирано е дека сите патници пополнуваат писмена изјава со која под кривична, морална одговорност се согласуваат да седат во изолација.
Таа рече дека отстапувања биле забележани кај фирми што работат со транспорт и промет на храна во однос на носењето ракавици и заштитни маски. Затоа во инспекциите интензивно се вклучуваат и инспектори од Агенцијата за храна и ветеринарство.
Во однос на покачените цени во аптеките, пак, Филипоска-Грашкоска, рече дека има покачувања, но поради зголемена набавка цена
„Агенцијата за лекови и медицински средства (МАЛМЕД) во периодот од овие три дена изврши вкупно 17 надзори, при што е констатирано дека се зголемени цени во аптеките, но тоа се должи на зголемена набавна цена. Согласно ова, МАЛМЕД ѝ дава препорака на Владата да утврди максимална цена на ракавици, заштитни маски и средства за дезинфекција, која не смее да се надмине во прометот на големо и мало“,
рече Филипоска-Грашкоска.
Пазарниот инспекторат, пак, во три дена извршил 8 200 надзори. Констатирано е дека во најголем дел угостителите ги почитуваат мерките и забраната за работа, но имало и случаи каде не се почитувале. Така, биле затворени вкупно 14 угостителски објекти: 6 во Скопје, 3 во Тетово, по 2 во Битола и во Гостивар и еден во Куманово.
Државниот инспекторат за транспорт, пак, констатирал дека меѓуопштинскиот сообраќај е намален од 70 до 80 проценти, додека меѓународниот е во целосен прекин.
Трудовиот инспекторат, соопшти Филипоска-Фрашоска, имал 573 контроли и долен 5 решенија и 26 укажување кои се однесуваат на непостапување по препораките на Владата, најмногу на оние за ослободување на вработени со мали деца.