Собраниската комисија за политички систем ја отфрли како неуредна граѓанската иницијатива за собирање потписи за референдум против воведувањето дигитални учебници. Според образложението, барањето доставено од групата „Учебници и настава мора да има“ не било во согласност со Законот за референдум, односно доставените 500 потписи не биле собрани пред надлежни институции.
„Потписите не се собрани пред овластена институција – подрачните единици на Министерството за правда, каде што во работно време треба да се потпишат и треба печат од институцијата. Тоа е процедурата, на таков начин треба да се соберат 100 потписи. Кога ќе биде уредна иницијативата, треба да ја поднесат во Собрание и во рок од два дена Комисијата за политички систем и Законодавно-правната комисија треба да донесат одлука за уредноста. Доколку е уредно поднесена, постапката продолжува понатаму и двете комисии упатуваат извештај до претседателот на Собранието,“
објасни пратеничката Соња Мираковска, претседателка на Комисијата за политички систем.
Заклучокот на Комисијата ќе биде доставен до претседателот на Собранието, а во меѓу време потписниците на иницијативата имаат можност да го соберат потребниот минимум од 100 потписи во соодветни канцеларии, додаде Мираковска.
Родителите што бараат повлекување на Законот за учебници пред два дена ја доставија иницијативата за референдум до Собранието од каде што очекуваа зелено светло за да отпочнат со собирање на 10 илјади потписи за спроведување референдум на државно ниво.