Од Клиниката за инфективни болести за МИА потврдиле дека е хоспитализиран мигрант суспектен на мајмунски сипаници, кој вчера беше повреден во сообраќајната незгода на патот Гевгелија-Демир Капија.
Мигрантот, како што информираат од Клиниката за инфективни болести, е тестиран и е негативен.
За првиот пациент од Кичево, кој покажал симптоми на мајмунски сипаници, сè уште се чекаат резултатите.
Д-р Злате Мехмедовиќ од Комисијата за заразни болести за „360 степени“ утрово изјави дека се уште нема нови информации во врска со случајот од Кичево и дека засега остануваат на тоа дека сите надлежни институции се активно вклучени во процесот на епидемилошка анализа, евентуална лабораториска потврда и изолација на суспектниот случај.
Од ИЈЗ ни изјавија дека се уште нема информации за тоа дали се работи за ваков случај. Директорот Шабан Мемети вели дека процедурата за тоа е пообемна и опфаќа и лабораториски испитувања и социолошки импликации.
Никој од нив не можеше да каже кога би можело да се очекува резултатот од земениот примерок.
Вчера Комисијата за заразни болести препорача воведување мерки изолација/карантин за сите суспектни случаи како и секојдневно следење на контактите на заразените лица.
„КЗБ препорачува изолација во домашни или болнички услови на сомнителните случаи за мајмунски сипаници до нивно тестирање; изолација на потврдени случаи во домашни или болнички услови до завршување на болеста или зацелување на крастите; секојденвно епидемиолошко следење на контакти на потврдени случаи со мајмунски сипаници за време на трење на инкубацискиот период од 21 ден. КЗБ ја реафирмира препораката до Министерството за здравство да се преземат сите неопходни превентивни мерки”
соопштија од Комисијата за заразни болести.