Безбедноста ќе биде засилена, а се очекува да бидат распоредени околу 25 илјади полицајци и воени лица за обезбедување на церемонијата на инаугурацијата
Американската агенција за национална безбедност предупредува дека инаугурацијата на новоизбраниот претседател Доналд Трамп ќе биде „потенцијална цел“ за екстремисти, иако тие велат дека нема конкретни закани, пренесува „Политико“.
Според проценката на заканите од група разузнавачки и агенции за спроведување на законот, која не е објавена, а во која „Политико“ пишува дека имале увид, потенцијалните сторители, особено оние со „поплаки поврзани со изборите“, може да ја гледаат заклетвата на новоизбраниот претседател како „нивна последна можност да влијаат врз изборните резултати преку насилство“.
Загриженоста на агенциите ја одразува засилената политичка – и потенцијално насилна – средина во која Трамп ќе ја преземе власта.
Поради тоа, безбедноста ќе биде засилена, а се очекува да бидат распоредени околу 25 илјади полицајци и воени лица за обезбедување на церемонијата на инаугурацијата.
Официјалните лица се во состојба на готовност со месеци по двата обиди за атентат врз Трамп за време на кампањата во 2024 година.
Проценката на заканите, составена од ФБИ, Тајната служба, полицијата на Капитол, владата на Вашингтон и полицискиот оддел на Врховниот суд, наведе низа сценарија во кои се вклучени странски терористи, домашни екстремисти и волци самотници кои би можеле да извршат бомбашки напади, летови со беспилотни летала или напади врз возила и слично.
Службениците за спроведување на законот, исто така, се загрижени дека протестите околу инаугурацијата би можеле да станат бурни. Голем број групи аплицираа за дозволи за демонстрации, вклучително и некои кои претходно организираа протести кои завршија со апсења.
„Минатите протести на некои од овие лица вклучуваа блокади на сообраќајот, неовластено влегување на имот, уништување имот и отпор при апсење“,
се додава во проценката на заканите.
Како што се наведува, документот е слично форматиран како оној испратен во 2021 година пред инаугурацијата на претседателот Џо Бајден. Во исто време, документот покажува како се промениле опасностите во изминатите четири години – особено во однос на заканите на Иран за Трамп и тензиите поттикнати од војната во Газа.