Пратеничката ја соопшти одлуката на својот фејсбук-профил, а како причина ги наведе слабите резултати на Алијанса за Албанците на последните избори за Совет на Општина Тетово, на кои нејзината партија не освои ниту еден мандат
Пратеничката на Алијанса за Албанците, Илире Даути, денеска соопшти дека понела оставка од функцијата координатор на пратеничката група на партијата во Собранието.
Пратеничката ја соопшти одлуката на својот фејсбук-профил, а како причина ги наведе слабите резултати на Алијанса за Албанците на последните избори за Совет на Општина Тетово, на кои нејзината партија не освои ниту еден мандат.
„Резултатот на последните локални избори, а уште повеќе многу слабиот резултат за Советот на Тетово, ме погоди и мене, а мојата совест како пратеник од шестата изборна единица не го надминува тоа и не можам да бидам рамнодушна. Затоа, ве информирам дека штотуку поднесов оставка од функцијата координатор на пратеничката група на Алијансата за Албанците, единствена титула што ја имам во моментов од политичкиот субјект. Вам кои верувавте во мене континуирано, сакам да ви кажам благодарам од се срце, ако можете продолжете да верувате во мене затоа што јас силно верувам во вас“,
стои во објавата на Даути.
Претходно, односно уште следниот ден по изборите за Совет на Општина Тетово, кои се одржаа на 20 август, оставка поднесе лидерот на Алијанса за Албанците, Зијадин Села, поради катастрофалниот резултат во Тетово.
Села тогаш изјави дека резултатите не биле очекувани и дека поради тоа е подготвен да преземе одговорност.
„Од овој момент, преземам одговорност и давам неотповиклива оставка од претседател на партијата. Во периодот што следува највисокиот орган на партијата меѓу два конгреса – Централното собрание, треба да заседава и да одлучи во врска со тоа кој ќе биде вршител на должност претседател на партијата“,
рече Села заблагодарувајќи им се на сите поддржувачи на Алијанса за Албанците.
Од партијата најавија темелни анализи за да види која е причината за лошиот резултат на изборите за Советот на Општина Тетово.