Спикерот реши да ја прекине седницата за пратенички прашања и без претходна најава ја закажа 36. седница, иако денеска во парламентот нема 61 пратеник за да може да се утврди дневниот ред
Наместо седницата за пратенички прашања, спикерот Талат Џафери им приреди претпладнево своевидно изненадување на опозициските пратеници, кога набрзина ја врати на дневен ред 36. седница, во чија агенда се и четирите закони од сетот антикризни мерки, за кои ВМРО-ДПМНЕ бараше да се стават на посебно заседание и веднаш да бидат донесени.
Во меѓувреме, за време на паузата што ја побара координаторот на ВМРО-ДПМНЕ Никола Мицевски, пратеникот на СДСМ Костадин Костадинов соопшти дека пратениците од мнозинството се откажуваат од можноста да им поставуваат прашања на членовите на Владата и дека тој простор ќе им го отстапат на опозициските пратеници, кои ги повика да влезат во салата и прво да бидат утврдени приоритетните точки од дневниот ред на 36. седница и да се гласа за потребата да бидат донесени во скратена постапка.
Џафери не го навести овој потег на брифингот што претпладнево го имаше со новинарите, иако рече дека не прифаќа да разговара за ултимативните барања на опозицијата за закажување посебна седница, туку дека се држи до процедурите.
Останува неизвесно дали и како ќе биде утврден дневниот ред на 36. седница што ненадејно ја закажа спикерот, со оглед на тоа што, барем до 14 часот, во парламентот не беа присутни 61 пратеник од мнозинството. Според информациите, покрај двајца пратеници што се ковид-позитивни, отсутни се уште двајца, така што мнозинството денеска брои само 58 гласа.
Координаторот на пратеничката група на ВМРО-ДПМНЕ претходно изјави дека постои деловничка можност за закажување посебна седница, при што се повика на членот 69 став 1 од Деловникот на Собранието: „Дневниот ред за седницата на Собранието го предлага претседателот на Собранието, а го утврдува Собранието на почетокот на седницата.“
Кога Џафери ја закажа новата седница, Мицевски оцени во салата дека тоа е обид за замолчување на опозицијата и за одржување криминална седница.
„Дали сте свесни дека денеска правите преседан што го нема направено ниту еден претседател на Собранието до денес? Мислев дека сте многу посериозен од она што се обидувате да го направите – да свикате криминална седница и да ги спречите пратениците на ВМРО-ДПМНЕ да поставуваат пратенички прашања. Граѓаните сакаат да слушнат одговори од власта. Нема да ги дозволиме сите овие спинови и кршења на Деловникот што ги правите. Ветувавте дека имате стабилно мнозинство, а јас реков дека нема да ви правиме кворум на седниците посебно не за штетните закони. Продолжувате да се однесувате како да имате 100 пратеници, а не 62. Имавте можност пакетот мерки да го донесете на 3 март кога си самоизгласавте самодоверба. Затоа, да не ја обвинувате опозицијата, ваша е одговорноста“,
истакна Мицевски.
Џафери рече дека постапува врз основа на прописите, но и барањата што опозицијата ги изнесувала преку Фејсбук и на прес-конференции, посебно изминатите неколку дена.
„Јас сум практичар што спроведува пропис, а тоа дали ми се допаѓа прописот или не, е друга работа. Деловникот дава надлежност претседателот да ги свика седниците и да предлага дневен ред, а конечната одлука за точките на дневниот ред е одлука на пленумот. За да останам доследен на она што го зборувам, предлагам денеска да не почнеме со пратенички прашања, туку да ја свикам веднаш 36. седница и до донесување на дневен ред да работиме на неа. Каков ќе биде дневниот ред, ќе биде ваша одлука. Тука да се прекине за да се отвори пат да се остварат пораките што ми се праќаат по Фејсбук дека би биле подготвени сите да се донесат законите од економската сфера за пакетот мерки. Конечниот мој предлог е наместо пратенички прашања да ја отворам 36. седница“,
рече Џафери.