Претседателот на Независниот синдикат на Управата за водење матични книги, Тони Милошески, истакна оти луѓето кои имаат потреба од услугите на Управата засега имаат разбирање за штрајкот, а оти штрајкувањето ќе продолжи сè додека нивните барања не бидат исполнети
Од осум часот утринава Управата за водење матични книги е недостапна за граѓаните поради генералниот штрајк кој утрово започна, а вчера беше најавен од Независниот синдикат на Управата.
Како што за МИА изјави Тони Милошески, претседателот на Независниот синдикат на Управата, сите подрачни одделенија од Управата се во штрајк.
„Сите подрачни единици се во штрајк, може да има некои исклучоци, мислам дека Куманово, некои од волонтерите работат, но сигурно под притисок од управата, значи 90 проценти од Управата е во штрајк“,
појасни Милошески.
Тој додаде оти засега луѓето што доаѓаат имаат разбирање за штрајкот.
„Знаат луѓето дека штрајкуваме, не се бунат, а им треба да завршат работа, има некои луѓе што треба да патуваат, но не можат да излезат од од државата без документите кои ние треба да им ги дадеме“,
потенцира Милошески.
Милошески додаде дека излегувањето на улица не е опција, но оти ќе штрајкуваат сè додека нивните барања не бидат исполнети.
Независниот синдикат на Управата за водење матични книги бара колективен договор на ниво на работодавач, линерано покачување на платите и унапредување на работните позиции.