На средбата меѓу министерот за правда, Никола Тупанчески и словенечката министерка за дигитализација, Емилија Стојменова-Дух, која е со македонско потекло, била нагласена потребата од интероперабилност и поголемо дигитално поврзување на институциите. Стојменова-Дух го пренела искуството на Словенија во оваа област, нагласувајќи дека Центарот за информатика во Врховниот суд има голема улога во имплементацијата на целиот процес
Како што информираа од Судскиот совет неделава, во тек е подготовка на нов АКМИС, како дел од процесот за дигитализација на судскиот систем во С Македонија со цел за негова поголема независност и транспарентност. За новиот АКМИС Кралството Норвешка ќе донира 6,8 милиони евра
Словенија е подготвена да и помогне на земјава во процесот на дигитализација на правосудниот систем, истакнала словенечката министерка без ресор задолжена за дигитализација, Емилија Стојменова-Дух на средбата со министерот за правда, Никола Тупанчески во Љубљана.
Инаку, Стојменова-Дух е со македонско потекло и стана министерка за дигитализација во владата на словенечкиот премиер, Роберт Голоб која беше избрана во мај годинава.
„Стојменова-Дух изрази подготвеност да ни помогне во процесот на реализација на дигитализацијата во судската и обвинителската дејност. Министерот Тупанчески ја информираше Стојменова за дигитализацијата во нашиот судски систем кој ќе биде предизвик за отстранување на факторите кои доведуваат до криминал и корупција“,
стои во соопштението од Министерството за правда.
На средбата била нагласена потребата од интероперабилност и поголемо дигитално поврзување на институциите, а Стојменова-Дух го пренела искуството на Словенија во оваа област, нагласувајќи дека Центарот за информатика во Врховниот суд има голема улога во имплементацијата на целиот процес.
Тупанчески и Стојменова-Дух се договориле да се интензивира соработката меѓу двете држави во пресрет на преговарачкиот процес со Европската Унија, наведуваат од Министерството за правда.
Како што информираа од Судскиот совет неделава, во тек е подготовка на нов АКМИС, како дел од процесот за дигитализација на судскиот систем во С Македонија со цел за негова поголема независност и транспаретност.
За новиот АКМИС Кралството Норвешка ќе донира 6,8 милиони евра, беше соопштено по средбата на претседателката на Судскиот совет, Павлина Црвенковска, со директорот на норвешкиот Судскиот совет, Свен Мариус Урке, што се одржа во понеделникот.
Директорот на Судскиот совет на Норвешка ја потенцираше неопходноста од целосно дигитализирање на македонскиот судски систем преку современа информатичка технологија со цел да се олесни пристапот на граѓаните до судството, но и да се создаде поефикасен, потранспарентен и понезависен судски систем.
Актуелниот АКМИС досега беше предмет на голем број контроверзии и случаи на негова злоупотреба, поради што поранешниот претседател на скопскиот кривичен суд, Владимир Панчевски беше осуден на две и полгодишна затворска казна, а една судијка беше разрешена од Судскиот совет поради „повреди на судскиот деловник по однос на примената на АКМИС, кој се однесува на распределбата на предметите“.