Координаторот Никола Мицевски објасни зошто пратениците од ВМРО-ДПМНЕ ќе гласаат за ратификација на Северноатлантскиот договор: Ние како партија што ги следи принципите на легалност и реалност, која може да ја критикуваме и имаме право да ја оспоруваме, во никој случај немаме намера да ја загрозиме суштинската определба и заслуженото членство во НАТО
Нола Исмајлоска-Старова, од името на независната пратеничка група на ВМРО-ДПМНЕ, потсетувајќи на улогата што ја имаа 8-темина пратеници за носењето на уставните измени, рече: Додека едни избраа да останат настрана и да стојат до ѕид, осум луѓе понесоа одговорност да опстојат на статутарните определби на својата партија и стратегиските интереси на државата
Никола Мицевски, координатор на пратеничката група на ВМРО-ДПМНЕ, и Нола Исмајлоска-Старова, од името на 8-темина пратеници од ВМРО-ДПМНЕ и коалицијата кои ги поддржаа уставните измени за името, се соочија со две различни политички парадигми на свечената седница на Собранието за ратификација на членството во НАТО.
Мицевски за Северна Македонија: Ги следиме принципите на легалност и реалност
Мицевски, кому му припадна задачата да објасни зошто неговата партија ќе гласа „за“ членство на Северна Македонија во НАТО, потсети дека „првата Декларација за влез на државата во НАТО е поднесена далечната 1993 година токму од ВМРО-ДПМНЕ.“
Тој зборуваше и зошто пратениците од ВМРО-ДПМНЕ иницираа предвремена ратификација на Протоколот за членство во НАТО.
„Македонија го има заслужено своето членство во НАТО уште во 2008 година. За жал, на самитот во Букурешт, иако беше констатирано дека ги има исполнето сите релевантни критериуми, Република Македонија беше блокирана и не доби покана за членство. Како во 2008 година, така и денес, Република Македонија заслужува да биде земја членка на Северноатлантската алијанса. Оваа стратешка определба на ВМРО-ДПМНЕ е дел и од Статутот на партијата каде што во членот 8, во Цели и Задачи стои дека партијата ќе се залага за вклучување на државата во Европската Унија и во НАТО“, рече Мицевски.
Втората причина, според Мицевски, била да се избегнат какви било изговори од страна на владејачкото мнозинство за одложување на веќе закажаните избори на 12 април.
„Сакам да нагласам пред медиумската јавност и пред граѓаните на Македонија, како и пред претставниците на СДСМ кои оркестрирано се обидуваат да не обвинат дека како партија не сме за НАТО поради наметнатата додавка во нашето уставно име: Ние сме политичка партија што ги следи принципите на легалност и реалност која што може да ја критикуваме и имаме право да ја оспоруваме, но во никој случај немаме намера како партија да ја загрозиме суштинската определба и заслуженото членство во НАТО кое што земјава го чека полни 12 години“, порача Мицевски од собраниската говорница.
Координаторот на пратеничката група на ВМРО-ДПМНЕ зборуваше и за, како што рече, обиди на манипулации со граѓаните за противењето од ВМРО-ДПМНЕ за смена на името на Армијата на Република Македонија.
„Она што дополнително треба да се знае, а власта свесно го премолчува е дека во самиот договор со Грција, кој што секој има право да го критикува, пишува дека називите на одредени институции, установи, органи, или документи кои што се претежно за внатрешна употреба во државата, ќе треба да почнат да се менуваат откако ќе почнат преговорите на Македонија со Европската Унија во таа област односно со секое ново отворено поглавје.
За жал, оваа Влада неколку пати досега излажа дека сме добиле датум за преговори со ЕУ, а уште помалку преговараме со Унијата за областа наречена безбедност, армија и се друго што оди на тој план. Затоа, сметаме дека во овој момент не треба да се политизира ова прашање за Законот за Армијата, а името на Армијата може да биде еден дел од достоинството што припадниците на Армијата го заслужиле од земја која што ќе биде полноправна членка на НАТО Алијансата“, рече Мицевски.
Исмајлоска-Старова: Некои стоеја до ѕид, ние гласавме за иднина во НАТО
Нола Исмајлоска-Старова, која зборуваше од името на независната пратеничка група на ВМРО-ДПМНЕ, го искористи обраќањето за да потсети на улогата што ја имаа 8-темина пратеници од оваа групација за процесот на интеграција на земјава во НАТО да стигне до оваа фаза.
„Ќе говорам во овој историски момент за кој ние, секој од нас 8-мина, имаме силна лична заслуга. Денес е еден од оние денови што во животот се прераскажуваат, се пренесуваат од колено на колено, со посебен сјај во очите, особена гордост и се значаен дел од историјата. Ратификацијата на Северноатлантскиот договор е нашата можност да го обезбедиме територијалниот интегритет, да ја приближиме сигурноста до нашите граѓани преку реализација на нивниот избор дека треба да бидеме дел од НАТО алијансата“, рече Исмајлоска.
Таа додаде дека „денес е еден од оние денови во кои конечно седиме сите заедно, 27 години подоцна од првата Декларација за влез на Република Македонија во НАТО, која била поднесена од ВМРО-ДПМНЕ. И таа, како и Мицевски, се повика на член 8 од Статутот на партијата, кој во заложбите на ВМРО-ДПМНЕ вбројува градење на пријателства и добрососедство со сите соседни држави како основа на нов балкански поредок и вклучување на државата во ЕУ и НАТО.
„На 19 октомври 2018 година, овој парламентарен состав беше исправен пред можноста да и помогне на нашата татковина во чекорот неопходен за продолжување по евроатлантската патека кон која сите сме се обврзале да биде нашиот избор за подобро утре. Тој ден, 80 луѓе решија да седат и притиснат ЗА денес Република Северна Македонија да го заокружи во рекордно брз период членството во НАТО. Додека едни избраа да останат на страна и стојат до ѕид, 8 луѓе понесоа одговорност да опстојат на статутарните определби на својата партија но и стратешките интереси на нивната држава. Емилија Александрова, Зеќир Рамчиловиќ, Сашо Василески, Љубен Арнаудов, Владанка Авировиќ, Крсто Мукоски и Елизабета Камчевска Милеска бидете горди, бидејќи денес е денот во кој сите сме повторно заедно обединети и гласаме за Северна Македонија да ни биде побезбедна, посигурна и стабилна. Вашата заслуга ќе ја бележи историјата како државничка, храбра и неопходна за овој свечен чин да го живееме сите“, порача пратеничката Исмајлоска-Старова.