Владата, вели премиерот, доделила државјанство врз основа на позитивните мислења што ги добила
И премиерот Димитар Ковачевски денеска нагласи дека се добиени сите потребни позитивни мислења од релевантните институции за во мај годинава да му се додели македонско државјанство на украинскиот политичар Олександр Онишченко кој се наоѓа на листата на санкционирани личности од САД, на која е ставен во јануари 2021 година, поради тоа што е „член на руската мрежа за влијание врз американските претседателски избори“.
„При издавањето на тоа државјанство биле прибавени сите позитивни мислења од сите релевантни институции согласно со процедурата. Врз основа на тие позитивни мислења Владата донела одлука да додели државјанство“,
изјави денеска Ковачевски во одговор на новинарски прашања.
Нормално е, додаде, како Влада да побараме и други испитувања за да видиме дали постојат и некакви други информации коишто треба да бидат замени предвид.
Денеска и министерот за внатрешни работи посочи дека четири институции дале позитивно мислење Агенцијата за национална безбедност (АНБ), Македонскиот олимписки комитет и Агенцијата за млади и спорт.
„Станува збор за добивање државјанство по член 11. Не е државјанство кое го доделува МВР туку Владата. МВР ги прибира сите документи, станува збор за предмет кој добил позитивни оценки од четири релевантни институции во државата. На крајот на Влада се носи одлука и Владата има дискрециско право да даде на којшто било аплицира во овој дел … Сите проверки од сите четири институции се позитивни. АНБ, Македонски олимписки комитет, Агенција за млади и спорт. Тоа е за во конкретниот случај. За други случаи има други органи што даваат мислење, на пример, ако е за економија, даваат министерствата за економија, за финансии итн.“,
изјави Спасовски.
Членот 11 кој го споменува Спасовски, предвидува дека странец може да се стекне со државјанство ако тоа претставува особен научен, економски, културен, спортски или друг национален интерес.
Во случајот со Онишченко, како што веќе е познато, доделено е државјанство поради спортски интерес. Тој годинава, како што вчера објави „Призма“,настапил под македонското знаме на натпревар во коњски скокови, во Сен Тропе.
*Повеќе вести на оваа тема:
- Призма: Избеган украински политичар под санкции на САД, добил македонско државјанство
- Спасовски: За државјанството на Онишченко четири институции дале позитивно мислење
- Ковачки: Директорот на АНБ не заслужува да биде амбасадор откако даде позитивното мислење за државјанство на украинскиот политичар
- Алијанса за Албанците ја повика Владата веднаш да ја откаже одлуката за доделување државјанство на Онишченко