Според него, МНР мора да ја преиспита одлуката Димовски да биде испратен за амбасадор во Париз, а ако тоа не го направи Министерството, Ковачки повикува да реагира претседателот Пендаровски
Директорот на Агенцијата за национална безбедност (АНБ), Виктор Димовски, не заслужува да биде амбасадор на нашата земја во Франција, а ниту на чело на оваа институција откако било дадено позитивно мислење по проверката за доделување државјанство на лице кое е на црната листа на САД, реагира Драган Ковачки од ВМРО-ДПМНЕ.
„Последниот скандал со изработка на позитивна проверка за лице за добивање државјанство, а кое било барано со потерница и е ставено на црна листа на стратешкиот сојузник – САД, само потврдува дека АНБ е во целосен нокаут и дека криминалот е длабоко навлезен во структурите. Очигледно е дека кога се пари во прашање, за раководството во АНБ не постои Закон и процедура која не може да ја заобиколи, притоа не водејќи сметка за штетата на меѓународниот углед кој ѝ го нанесува на најмладата НАТО членка“,
вели Ковачки.
После овој и сите скандали, според него, МНР мора да ја преиспита одлуката Димовски да биде испратен за амбасадор во Париз, а ако тоа не го направи Министерството, Ковачки повикува да реагира претседателот Стево Пендаровски.
„Доколку МНР не ја повлече одлуката за номинирање на сè уште актуелниот директор на АНБ за амбасадор во Франција, на потег ќе биде претседателот Пендаровски. Барем еднаш нека се одважи и нека не биде партиски извршител, односно нека не го потпишува Указот за лице кое ѝ нанесува срам на Македонија“,
вели Ковачки.
Реакцијата следува откако вчера „Призма“ објави дека украинскиот политичар Олександр Онишченко во мај годинава добил македонско државјанство, иако се наоѓа на листата на санкционирани личности од САД, на која е ставен во јануари 2021 година, поради тоа што е „член на руската мрежа за влијание врз американските претседателски избори“.
Онишченко дури и ја претставуваше Северна Македонија на меѓународна сцена. Имено, пет месеци откога го добива македонското државјанство, тој настапил под македонското знаме на натпревар во коњски скокови, во Сен Тропе.
Покрај ВМРО-ДПМНЕ, вчера реагираше и опозициската Алијанса за Албанците која побара Владата веднаш да ја преиспита одлуката за доделување на државјанство.