Иницијаторите на бојкотот посочуваат дека целта на акцијата е да се изврши притисок врз властите и работодавците да преземат конкретни мерки за намалување на инфлацијата, зголемување на минималната плата и подобрување на севкупниот животен стандард на граѓаните
По успешната граѓанска акција во Хрватска, на социјалните мрежи во Босна и Херцеговина се шират повици за бојкот на продавници, бензински пумпи, кафулиња и ресторани во петок (31 јануари 2025 г.), како израз на незадоволство од високите цени и нискиот животен стандард.
Иницијаторите на кампањата ги повикуваат граѓаните тој ден не купуваат ништо и однапред да ги обезбедат потребните намирници, да готват дома и да избегнуваат трошење пари во ресторани.
„Ова е начин да го покажеме нашето незадоволство од поскапувањето на храната и енергентите, додека платите на граѓаните остануваат ниски. Еден ден бојкот може да испрати силна порака“,
се вели во една од пораките споделена на социјалните мрежи, пренесува ХРТ.
Граѓаните на форумите на интернет пишуваат дека цените на храната во БиХ се повисоки отколку во некои развиени земји како Германија, додека трошоците за домување остануваат неподносливи.
Според Адис Кеча, претставник на Конфедерацијата на автономни синдикати на Босна и Херцеговина, ваквите постапки се предупредување за сериозните социо-економски проблеми во земјата.
Тој предупредува дека профитот на работодавците расте, но тоа не се совпаѓа со платите на работниците, кои се недоволни за покривање на основните животни трошоци.
Иницијаторите на бојкотот посочуваат дека целта на акцијата е да се изврши притисок врз властите и работодавците да преземат конкретни мерки за намалување на инфлацијата, зголемување на минималната плата и подобрување на севкупниот животен стандард на граѓаните.
Инаку, властите во Босна и Херцеговина во повеќе наврати воведуваа замрзнување на цените за основните прехранбени производи, како одговор на инфлацијата.