Бугарија е единствена полоша од нас, рече хрватскиот претседател Зоран Милановиќ кој присуствуваше на одбележувањето на Денот на хрватскиот град Златар каде што го критикуваше процесот на децентрализација во земјата
По повод Денот на градот Златар, претседателот на Република Хрватска, Зоран Милановиќ, учествуваше на седницата на Градскиот совет и изјави дека Хрватска е на дното на Европската Унија, кога се гледаат поранешните социјалистички земји, објави Дневник.хр.
Бугарија е единствена полоша од нас, рече Милановиќ и додаде: „секое утро му се молиме на Бога ништо да не ѝ се случи за да има кој да биде последен“.
„Не треба да се задоволуваме со тоа. Немам никаква врска со ниту една партија, со ниту еден изборен список. За почеток, Хрватска мора да биде некаде на средина, а потоа да размислува во конкуренција со Унгарија, Чешка, а не Данска и Шведска, да бидеме најдобри, да бидеме како Словенија, која имаше менаџерски способности и среќа да се развие малку поинаку од Хрватска во последните 30 години“,
рече Милановиќ.
Милановиќ го критикуваше нивото на децентрализација во Хрватска велејќи дека е мизерно.
„Овде, за жал, ништо не се прави, не затоа што не се знае, бидејќи моделите постојат, туку затоа што не се сака, затоа што се губи политичкото влијание, рекетот и можноста за изнуда“,
рече Милановиќ.
Тој нагласи дека сега е друго време, светот се менува, а и Европа се менува. Посочи дека младите почнуваат да излегуваат на избори. „Очекувањата се различни, но она што не се менува е желбата на луѓето да живеат добро и квалитетно“, смета тој.