Од Сојузот на стопански комори (ССК) денеска реагираа дека зголемувањето на минималната плата поради политички популизам ќе доведе единствено до дестабилизација на како што велат, и онака нефункционалниот пазар на труд
Aнгажманите на Владата се зголемувањето на минималната плата да биде 18 000 денари со цел подигање и проширување на работничките права, истакна владиниот портпарол Муамед Хоџа, откако од Сојузот на стопански комори (ССК) денеска реагираа дека таа одлука е политички популизам и дека единствено ќе предизвика дестабилизација на пазарот на труд.
„Оваа одлука треба да се случи во иднина и е во насока на пораст на правата на работниците“,
порача Хоџа.
Од Сојузот на стопански комори (ССК), пак, денеска истакнаа дека зголемувањето на минималната плата поради политички популизам, а не поради функционалност на пазарните механизми ќе доведе до намалување на работните места, раст на цените на производите и раст на сивата економија.
Освен тоа, според нив ваквата одлука ќе ги стави компаниите во дополнителен трошок, особено во период на здравствено-економска криза.
Претходно, Сојузот на синдикати на Македонија (ССМ) поднесе предлог до Собранието и до Министерството за труд и социјална политика за донесување закон со кој минималната плата треба да изнесува 18 000 денари и да не биде пониска од 60 отсто од просечната плата, како и спирално зголемување на сите останати плати во државата.
По барање на ССМ се работи и на анализа за влијанието на минималната плата врз стопанството чии првични резултати, според нив, покажуваат дека покачувањето на минималната плата не влијае негативно, туку напротив позитивно на продуктивноста на работниците.