„Вашингтон пост“ пишува дека вирусот најверојатно го добил на митингот на претседателот Доналд Трамп во Тулса, Оклахома, на 20 јуни
Републиканецот Херман Кејн, поранешен можен кандидат за претседател на САД, почина синоќа на 74-годишна возраст, по кратко боледување проследено од симптоми на ковид-19.
Поранешниот менаџер на синџир пицерии, републикански активист и кандидат за претседател на изборите во 2012 година, бил хоспитализиран пред неколку недели во Атланта, Џорџија, по позитивен тест од коронавирус.
„Вашингтон пост“ пишува дека вирусот најверојатно го добил на митингот на претседателот Доналд Трамп во Тулса, Оклахома, на 20 јуни.
Како копретседател на групата „Црните гласови за Трамп“, Кејн беше фотографиран без маска и без да држи физичко растојание.
Тој е еден од поистакнатите политичари кои настрада од пандемијата.
Иако во САД има речиси 4,4 милиони заразени и над 152 000 смртни случаи, и други истакнати републикански политичари сѐ уште не ја земаат сериозно опасноста од ковид-19 и не ги слушаат советите на експертите за носење маска и држење растојание.
Конгресменот Луј Гомерт од Тексас, кој е забележан како оди по холовите на американскиот Капитол без маска, во средата објави дека е позитивен на вирусот, токму пред планираното патување со Трамп во претседателскиот авион истиот ден.
Кејн на Твитер напиша дека маските не се обврзни на прославата за 4 јули, што Трамп ја одржа на планината Рашмор во Јужна Дакота.
„На луѓето им е преку глава“,
напиша тогаш Кејн, а набрзо потоа бил хоспитализиран со симптоми на ковид-19.
„Мојот пријател Херман Кејн, моќен глас за слобода и сѐ што е добро, почина утринава“,
напиша Трамп на Твитер.