Веб-страницата на Државната изборна комисија (ДИК) повторно не функционира во последниот еден час. Сѐ уште нема конечни резултати откако оние што беа објавени на веб-страницата околу 3 часот предизвикаа низа нелогичности и сомнежи. Нападот на електронскиот систем се чини предизвика хаос, велат од ДИК, но информираат дека сега рачно ги прегледуваат сите записници и најавуваат конечни неофицијални резултати во попладневните часови.
„Сѐ уште се врши прием на материјалот од општинските изборни комисии, и притоа рачно се проверуваат записниците за сумирање и утврдување на резултатите од избирачките места (записници бр. 16) , како и записниците за сумирање и утврдување на резултатите од општините (записник бр. 21), со цел точно да можат да се утврдат неофицијалните конечни резултати. Неофицијалните конечни резултати ќе бидат соопштени на попладневната седница на Државната изборна комисија“,
велат од ДИК.
Несовпаѓања на резултатите и на симулациите кои првично беа направени имаше и со проекциите што во текот на изборната ноќ излегуваа од партиите, но и помеѓу резултатите што изминатите часови ги објавуваше самата ДИК.
Според симулација на ДИК која беше објавена во раните утрински часови, распоредот на силите во новиот парламент би бил: СДСМ – 46 пратеници; ВМРО-ДПМНЕ – 44; ДУИ – 15; Алијанса за Албанците и Алтернатива – 12; Левица – 2 и ДПА – 1 пратеник.
Ваквите симулации не се совпаднаа со проекциите со кои во текот на изборната ноќ излегоа и СДСМ и ДУИ. Од ВМРО-ДПМНЕ, пак, избегнаа да кажат колку мандати очекуваат.
Поради несовпаѓањата, според партиски информации, кај социјалдемократите се проверуваат записник по записник, а разликата во проекциите со ДИК беше евидентна уште по обраќањето на партискиот лидер Зоран Заев. Тој изјави дека нивните пресметки покажуваат дека освоиле 49 мандати, што не е мала „утка“ споредено со 46-те мандати кои ги симулира ДИК. Но, во исто време, првиот човек на владејачката партија кажа и дека очекува ВМРО-ДПМНЕ да има барем три пратеника помалку од нив, што значи 46 или помалку, што повторно е подобар резултат од симулацијата на ДИК. Лидерот на ДУИ, Али Ахмети, пак, кажа дека освоиле 12 мандати, а според симулацијата на ДИК на интегративците им припаднале 15, што не е разлика која може да се занемари.
Порталот „Независен“, пак, излезе со анализа и на нелогичностите кои се појави на страницата на ДИК околу 3 часот бидејќи кога ќе се погледнат резултатите на ниво на држава и по изборни единици се појавуваат податоци кои никако не можат да се совпаднат.
„Прво, во 3:10 часот пишува дека биле обработени 3 459 избирачки места од вкупно 3 480 и дека СДСМ добил 36 отсто од гласовите, а ВМРО-ДПМНЕ 34,71 отсто. Тоа значи дека за обработка и внесување на податоците останале уште 21 избирачко место. Но потоа ако одите од изборна единица на изборна единица во истото време кога се внесувани податоците добивате комплетно други бројки. Така, на мапата за изборната единица 6 пишува дека се обработени 425 од 474 избирачки места и врз основа на тоа се определуваат мандатите. Тоа значи дека само во ИЕ 6 се необработени 49 избирачки места, а на главната мапа е наведена бројката дека вкупно остануваат уште 21 место“,
анализира „Независен“.
Во другите пет изборни единици е наведено дека треба да се обработат уште 58 избирачки места и заедно со оние 49 од „шестката“ се работи вкупно за 107, а не 21 како што е наведено на главната мапа. Уште еден пример кој го наведува „Независен“ е резултатот за Демир Хисар кога ќе се отвори интернет-страницата преку десктоп се покажуваат едни, а преку мобилен други.
„Претпоставено е дека оние преку вообичаен компјутер се точни, затоа што е нелогично ДУИ да има освоено 28 отсто од гласовите, Алијансата за Албанците 24,66, а дури потоа се СДСМ и ВМРО-ДПМНЕ, во општината која има занемарлива бројка етнички Албанци“,
пишува во анализата.