Владата минатата недела го одобри заклучокот предложен од Комитетот за преговори дека се исполнети сите предуслови за почеток на преговорите и формирање работни групи меѓу „Бехтел и Енка“ и „ИРД инженеринг“
Почнаа преговорите меѓу американско-турскиот конзорциум „Бехтел и Енка“ и меѓународниот конзорциум „ИРД инженеринг“ за изградба на автопатските делници од коридорите 8 и 10-д.
Ова денеска го најави првиот потпретседател на Владата и министер за политички систем и односи меѓу заедниците Артан Груби по средбата што ја имаа со претставници на двете фирми, „Бехтел и Енка“ и „ИРД инженеринг“. На средбата присуствувале и министерот за финансии Фатмир Бесими, министерот за транспорт и врски Благој Бочварски, како и директорот на Јавното претпријатие за државни патишта Ејуп Рустеми.
„Денешниот состанок доаѓа по состанокот на Комисијата за преговори за изградба на коридорите 8 и 10-д и Одлуката на Владата со која ја задолжи Комисијата за преговори за реализација на проектот за изградба на коридорите 8 и 10-д, кој е и правен консултант на Владата за договарање на договорот“,
се вели во соопштението од кабинетот на Груби.
Владата минатата недела го одобри заклучокот предложен од Комитетот за преговори дека се исполнети сите предуслови за почеток на преговорите и формирање на работни групи меѓу „Бехтел и Енка“ и „ИРД инженеринг“, преговори кои ќе траат 21 ден.
Почетокот на преговорите доаѓа откако минатата недела јавното претпријатие за државни патишта и меѓународниот конзорциум „ИРД инженеринг го потпишаа договорот за консултант и надзор на автопатите на коридорите 8 и 10-д што ќе ги гради американско-турскиот конзорциум „Бехтел и Енка“.
Американско-турскиот конзорциум „Бехтел и Енка“ ќе треба да изгради четири автопатски делници во должина од над 120 километри на коридорите 8 и 10-д, а во текот на годинава се очекува да почнат градежните активности.
Реализацијата на оваа капитална инвестиција ќе придонесе за модернизација на патната инфраструктура што во иднина ќе овозможи дополнителен развој на услугите, подобри услови за развој на бизнисот, но и безбедни услови за движење на луѓето.
Владата минатата година потпиша меморандум со „Бехтел и Енка”, а Собранието донесе Закон за утврдување јавен интерес и негово номинирање за стратегиски партнер за овој проект.