„Владата, на предлог на Комитетот за преговори за имплементација на проектот за изградба на инфраструктурниот Коридор 8, го задолжи преговарачкиот тим за сите детали и услови на Договорот за градење за проектот за изградба на инфраструктурниот Коридор 8 (делница Тетово – Гостивар – Букојчани и проектот за автопатот Требеништа – Струга – Ќафасан) и за Коридорот 10-д (делница на автопатот Прилеп – Битола) во Република Северна Македонија, да ги започне преговорите со стратешкот партнер на 6 февруари 2023 година“, се наведува во соопштението од владината прес-служба
Владата на една од двете седници што ги одржа денеска донесе одлука в понеделник, на 6 февруари, да започнат преговорите со стратешкиот партнер за изградбата на инфраструктурниот проект Коридор 8.
Како што соопштија од владината прес-служба попладнево, Владата денеска ги одржала 124. и 125. седница, на кои биле донесени неколку одлуки и заклучоци.
„Владата, на предлог на Комитетот за преговори за имплементација на проектот за изградба на инфраструктурниот Коридор 8, го задолжи преговарачкиот тим за сите детали и услови на Договорот за градење за проектот за изградба на инфраструктурниот Коридор 8 (делница Тетово – Гостивар – Букојчани и проектот за автопатот Требеништа – Струга – Ќафасан) и за Коридорот 10-д (делница на автопатот Прилеп – Битола) во Република Северна Македонија, да ги започне преговорите со стратешкот партнер на 6 февруари 2023 година“,
се наведува во соопштението од владината прес-служба.
За исходот од преговорите, Владата донела заклучок преговарачкиот тим да состави извештај што ќе го достави на разгледување и одобрување до Комитетот за преговори, во рок од 21 ден од денот на завршување на преговорите.
На седницата Владата ја разгледала и усвоила и Информацијата во врска со потребата од поднесување на ВБИФ-апликација за инвестициски грант, за изградбата на експресен пат А2 на делницата Крива Паланка – Длабочица – Страцин (Чатал), како дел од Коридор 8.
Изградбата на експресниот пат А2 на оваа делница, како што се посочува во соопштението, се имплементира со заем од Светска банка, односно со „Проектот за надградба и развој на патиштата“.
Вчера во Владата, Јавното претпријатие за државни патишта и меѓународниот конзорциум „ИРД инженеринг“ го потпишаа договорот за консултант и надзор на автопатите на коридорите 8 и 10-д што ќе ги гради американско-турскиот конзорциум „Бехтел и Енка“.
Со потпишувањето на договорот почнува преговарачкиот процес со американско-турскиот конзорциум „Бехтел и Енка“ за изградба на четири автопатски делници во должина од над 120 километри на коридорите 8 и 10-д, а во текот на годинава се очекува да почнат и градежни активности.
Со потпишувањето на овој проект, на коридорите 8 и 10-д се планира изградба на повеќе делници.
„Нашите стратешки планови се изградба на автопатските делници Требеништа-Струга-Ќафасан во должина од 22,5 километри, Гостивар-Букојчани со должина од 30,1 километар, како и 27 километри на делницата Тетово-Гостивар. На Коридорот 10-д ќе се гради делницата Прилеп-Битола со должина од 43,4 километри. Очекуваме оваа година да ја започнеме силната градежна офанзива за изградба на западниот дел од коридорот 8 и 10-д. Во буџетот на Министерството за транспорт и врски за оваа година се веќе предвидени 15 милијарди денари или околу 244 милиони евра за овој проект“, рече вчера министерот за транспорт и врски Благој Бочварски.
„ИРД инженеринг“ беше избрана за консултант и надзор на автопатите од коридорите 8 и 10-д на тендер во декември минатата година.
Тоа беше втор тендер за таа намена откако првата постапка беше поништена бидејќи избраниот понудувач во предвидениот рок не ја обезбеди банкарската гаранција за навремено и квалитетно извршување на договорот.
Владата минатата година потпиша меморандум со „Бехтел и Енка”, а Собранието донесе Закон за утврдување јавен интерес и негово номинирање за стратешки партнер за овој проект.