Првиот вицепремиер Груби изјавил оти политичките елити во Косово и Србија треба да го искористат примерот на нашата земја во однос на затворањето на билатералните спорови со Грција и Бугарија, со цел, како што вели, отворање на патот кон иднината
Косово и Србија треба да го земат за пример начинот на кој Северна Македонија ги реши отворените прашања со Грција и Бугарија, со што си го отвори патот кон Европскта Унија.
Ова го изјавил првиот вицепремиер на Владата Артан Груби во интервју за агенцијата „Косова Прес“, нагласувајќи оти Косово треба да се угледа на нашата држава во решавањето на отворените прашања со Србија со цел отворање на патот кон ЕУ.
„Политичката елита во Косово и политичката елита во Србија треба да го искористат примерот на Северна Македонија и Грција и Бугарија во затворањето на билатералните спорови со цел да се отвори патот кон иднината“,
изјавил Груби.
Тој во изјавата за косовската новинска агенција додал дека единствениот прифатлив резултат на преговорите меѓу Приштина и Белград е признавањето на косовската независност од страна на Србија.
„Нема друго решение за тоа отворено прашање во Југоисточна Европа меѓу Приштина и Белград освен признавањето на независноста на Република Косово од страна на Република Србија. Тоа е конечниот резултат кој ние го поддржуваме и е единтвениот кој го прифаќаме“,
додал Груби во интервјуто за „Косова Прес“.
Меѓу другото, Груби во интервјуто нагласил оти се залага за поголема координација меѓу Приштина, Тирана и Скопје, посебно за прашања од надворешната политика, за, како што рекол, „одбрана на вредностите“ на Ослободителната војска на Косово (ОВК).
„Приштина, Тирана и Скопје треба да се координираат многу повеќе во надворешната политика, посебно во одбрана на вредностите на ослободителната борба на ОВК, но и на тежнеењата на сите Албанци во Југоисточна Европа, за слобода, правда, еднаквост и независност на Косово, како и за меѓусебно признавање на Косово и Србија. Ништо лошо не може да му дојде на Косово од Скопје или Тирана, напротив, ќе ја има апсолутната поддршка за секоја иницијатива, било регионална, континентална или глобална“,
додава вицепремиерот Груби.