Првиот вицепремиер рече дека Владата денеска на седница усвоила пет предлог-закони кои ќе бидат доставени до пратениците, поврзани со изградбата на коридорите, а со кои треба да се надмине блокадата на предлог-измените на осум закони кои беа предложени од пратеници на владејачкото мнозинство. Новите предлог-измени ќе бидат со предложени со европско знаменце, а оправдувањето тој го даде со тоа што Европската Унија го додаде на картата на европските коридори
Првиот вицепремиер и координатор на изградбата на коридорите 8 и 10-д, Артан Груби, на денешната прес-конференција им се извини на медиумите, а со тоа и на јавноста ако, како што рече, не успеале да го претстават доволно јасно договорот со конзорциумот „Бехтел и Енка“, кој ќе ги гради автопатиштата и одредбите од него.
На оваа грешка, која според Груби била ненамерна, нему и на неколкумина министри им било укажано пред неколку дена на средба „со една интересна група“, без да прецизира за која.
„Пред неколку дена имавме една средба со неколку од министрите заедно со интересна група која ни укажа на една грешка која сме ја направиле ние, ненамерно, и би сакал најискрено да се извинам и на новинарите и на јавноста, ако не сме успеале во целост да ги претставиме доволно јасно потпишаниот договор, одредбите од потпишаниот договор пред сите вас, како што направиме пред Стопанската комора или пред пратениците на состаноците што ги имавме со нив“,
рече Груби од говорницата во прес-службата на Владата.
Инаку, на денешната прес-конференција првиот вицепремиер заедно со речиси половина министри и повеќемина директори на јавни претпријатија информираше за реализацијата на проектот за коридорите 8 и 10-д.
Груби информираше дека Владата на денешната седница која, судејќи според тајмингот кога беше закажана прес-конференцијата во 10:30 часот (иако започна со повеќе од получасовно задоцнување) се одржала рано утрово, усвоила пет предлог-закони кои ќе бидат доставени до пратениците, поврзани со изградбата на коридорите, а со кои треба да се надмине блокадата на предлог-измените на осум закони кои беа предложени од пратеници на владејачкото мнозинство.
Новите предлог-измени ќе бидат со предложени со европско знаменце.
„Увидувајќи ја очигледната блокада и заложништво на законите од страна на опозицијата и имајќи ги предвид интересите на граѓаните за брза поевтина и квалитетна изградба на автопатиштата Владата на денешната седница усвои пет предлог-закони кои ќе ги достави до пратениците. Со оглед на фактот што европската Унија го додаде на мапата на европските коридори и коридорот 8 како и неговото геостратегиско значење заедно со Коридорот 10 и кракот 10-д и дека за овие закони веќе подолго време во нашата јавност се води дебата и во Собранието и во Владата и во медиумите одлучивме законите да се предложат со европско знаме. Ги замолуваме пратениците да се откажат од блокади и да не ги поскапуваат автопатиштата со над 150 милиони евра пари на граѓаните и да не ги загрозуваат националните и стратегиски проекти само заради дневна политичка агенда. Од пратениците зависи дали ќе се гради побрзо и поевтино или побавно и поскапо. Ние сите заедно во Владата сме за опцијата поевтино и побрзо“,
рече Груби.
Договорот со американско-турскиот конзорциум „Бехтел и Енка“ кој е избрана за стратегиски партнер за реализација на проектот за изградбата на автопатите на дел од коридорите 8 и 10-д, беше потпишан во Владата на 8 март во Владата, а изградбата на делниците ќе чини 1,3 милиони евра.
Што точно е напишано во договорот и на какви услови се обврзале Владата од една и конзорциумот од друга страна, јавноста не можеше да добие на увид, затоа што договорот е таен и не беше објавен во јавноста.
Контроверзиите поврзани со договор добија на интензитет и на зголемен интерес кај експертската и обичната јавноста кога почетокот на април група пратеници од владејачката коалиција поднесоа пакет од девет закони поврзани со изградбата на коридорите 8 и 10-д по скратена постапка.
Пред пратениците за нивна измена се најдоа законите за културно наследство, за земјоделско земјиште, експропријација, урбанистичко планирање, минерални суровини, работни односи, шуми, градење, како и за утврдување јавен интерес и номинирање на стратегиски партнер за имплементација на проектот за изградба на инфраструктурниот Коридор 8 и Коридорот 10-д. Една од предлог-измените, онаа за Законот за културно наследство по неколку дена беше повлечена, по реакциите на стручната фела. Но, во јавниот дискурс продолжија да предизвикуваа бура предложените-измени на Законот за работни односи со кој се предвидува продолжување на работните часови за работниците кои ќе бидат ангажирани на изградбата на автопатите. Во предложените измени не беше наведена горна граница за работната недела, која според актуелниот Закон изнесува 40-работни часа неделно.
Оттука стана јасно дека Владата договорот со „Бехтел и Енка“ го склучила врз основа на непостоечки законски одредби.
Опозициската ВМРО-ДПМНЕ оттогаш постојано ја напаѓа Владата дека со договорот со „Бехтел и Енка“ се обврзала да ја зголеми работната недела од 40 на 60 работни часа за работниците кои ќе ги градат автопатите и дека ако 45 по попишувањето на договорот не бидат донесени измените на Законот за работни односи, државата ќе треба да му исплати пенали на американско-турскиот конзорциум. Од партијата во неколку наврати објавија делови од договорот за кои рекоа дека го поседуваат целост и дека го добиле од свиркачи. Од опозицијата обвинија за криминал и корупција во целиот случај и ги повикаа надлежните институции да отворат постапки за договорот.
Од Владата ги демантираа ваквите наводи тврдејќи дека не станува збор за пенали, туку дека ако не се зголеми работната недела, изградбата ќе трае подолго и тоа граѓаните ќе ги чини повеќе.
Деновиве опозициската ВМРО-ДПМНЕ побара пратениците кои поседуваат безбедносен сертификат да го одбијат на увид договорот со американско-турскиот конзорциум, но и оваа иницијатива остана на статус кво позиција. Од власта порачаа опозицијата да каже кога и во која собраниска комисија да се случи тоа, а од ВМРО-ДПМНЕ, пак, велат дека не може некој да им го презентира договорот односно дека имаат право да го добијат на увид. За да се закаже комисија, како што велат, мора прво да го имаат материјалот.
Во саботата Јавното претпријатие за државни патишта (ЈПДП) преку писмено соопштение информираше дека е извршен првиот трансфер на сметката на претпријатието на средства наменети за изградбата на коридорите 8 и 10-д, кои ќе ги гради американско-турскиот конзорциум „Бехтел и Енка“.
Според законските обврски од посебниот закон и потпишаниот договор со американско- турскиот конзорциум, како и согласно владината програма, беше наведено во соопштението, овие средства се наменети за мобилизација, екипирање со механизација, воспоставување кампови, лабораторија и други работи од страна на „Бехтел и Енка“ пред да се почне со градежните активности на трасите.