Здравствените власти на Грција попладнево соопштија дека трета доза од вакцината против ковид ќе биде потребна за лицата кои се сместени во домовите за стари, здравствените работници и за граѓаните над 60 години.
Како што јавува МИА, третата доза нема да биде задолжителна, а ќе се дава мРНА вакцина на шест до осум месеци по втората доза.
Претседателката на Комисијата за вакцинација, Мариа Теодориду, објасни дека намалувањето на антителата во комбинација со мутациите, биле главните причини, Комисијата да препорача и трета доза за конкретните категории, додека пак за веројатноста трета доза да примат сите граѓани, посочи дека ги очекуваат резултатите од соодветните студии на оваа тема, па дополнително ќе донесат одлуки.
Генералниот секретар во Министерството за здравство на Грција, Мариос Темистоклеус, објасни дека на крајот на месецов, односно на 30 септември ќе се отвори платформата за закажување на термин за третата доза за лицата над 60 година и за здравствените работници, доколку се поминати шест месеци од втората доза, а следната седмица ќе започне имунизацијата во домовите за стари лица со помош на мобилните единици.
Во однос на процесот на имунизација во земјата, според податоците што ги соопшти Темистоклеус, досега се аплицирани над 11, 9 милиони дози од вакцината, 6,3 милиони граѓани се вакцинирани со една доза, односно 60,6 отсто од општото и 70 проценти од полнолетното население.
Целосно имунизирани се околу 5,9 милиони лица, што е 56,7 проценти од општата и 65,6 отсто од полнолетната популација.