Намалување на брановите бегалци и мигранти, намалување на бројот на лица сместени во прифатните центри на островите, зголемен број префрлања во континентална Грција, се главните заклучоци од извештајот за март на Министерството за миграција и азил на Грција за ситуацијата во бегалското/мигрантското прашање во земјата, јави МИА од Атина.
Бројот на бегалци и мигранти кои пристигнале во Грција на островите и кај Еврос е намален за 16 отсто во текот на март, во споредба со февруари годинава, како и во споредба со истиот период лани.
Во јануари, пак, имало зголемување за 26 отсто, а во февруари 15 отсто, споредено со истите месеци во 2019 година.
Според податоците во месечниот извештај, од островите во другите делови на Грција, во првите три месеци од годинава, биле префрлени 10 687 бегалци и мигранти, а согласно Договорот ЕУ-Турција, во Турција биле вратени 139 лица.
Во овој момент, враќањата во Турција се прекинати.
Во центрите за прием и регистрација на островите, во март, е намален за 5,3 отсто бројот на сместени бегалци и мигранти, во однос на декември минатата година, а заклучно со 31 март, на Лезбос, Иос, Самос, Кос, Лерос и останатите помали острови, престојуваат 40 139 лица.
Неразгледаните барања за азил се намалени за 4,7 отсто во март и 2,7 проценти во првото тримесечје од годинава и нивната бројка денес изнесува 120 165 неразгледани одлуки, наспроти 123 515 на 31 декември 2019 година.