За земји како Грција, која зависи од туризмот, императив е проблемот да се реши пред летната сезона
Грчкиот премиер Кирјакос Мицотакис денеска предложи ЕУ да воведе единствен (унифициран) сертификат за вакцинација против коронавирусот, кој ќе важи за сите земји членки и ќе го олесни патувањето.
Во писмото до претседателката на Европската комисија, Урсула фон дер Лајен, Мицотакис истакнува дека вакцинацијата нема да биде задолжителна или предуслов за патување, но вакцинираните лица ќе можат да патуваат слободно.
„Итно е да се донесе заеднички став за тоа како треба да изгледа сертификатот за вакцинација, со цел сите членки на ЕУ да го прифатат“,
предлага Мицотакис.
Според него, ако членките на ЕУ се согласат за заеднички формулар, тоа може да влијае на слободата на патување на глобално ниво.
За земји како Грција, која зависи од туризмот, императив е проблемот да се реши пред летната сезона, посочува Мицотакис.